Abli na balik ang Metro Ayala
Mas hayag, mas dako og lugar.
Mao ni ang pipila sa namatikdan sa mga namalit sa bagong abli nga Supermarket sa Metro Ayala.
Ugmang adlawa ang unang tuig sa kasumaran sa pagkasunog sa sikat nga supermarket ug department store sa Ayala Center Cebu.
Kon usa ka sa naanad nga mag-grocery sa Metro Ayala, abli na kini og balik sukad niadtong Disyembre 30.
Anaa sa susamang pwesto kon diin nahimutang ang supermarket kaniadto samtang nagpabilin nga abli ang ilang gamay nga grocery nga duol ra usab sa maong bag-ong abli nga supermarket.
Sagad sa nabantayan sa mamalitay nga mas dako ang lugar sa bag-ong abli nga supermarket.
Matod sa tinun-an sa University of Bohol nga si Jovelle Christine Lajera, 22, kinsa kasamtangan nga nag-internship sa usa ka tambalanan sa dakbayan sa Sugbo, nga mas nidako ang lugar sa sulod itandi sa wala pa kini masunog nga huot.
Namatikdan usab niin nga mas nihayag kini karon ug mas daghang imported products nga mapalit.
Mao usab kini ang nabantayan sa kawani sa BPO nga si Jo Bañez, 38, kinsa na-surprisa nga dako na og lugar sa fruit section.
Kompleto ang stocks sa maong supermarket ug abli usab ang basement parking niini.
Gisuwayan sa Superbalita Cebu pagkuha ang habig sa Metro apan nagdumili kini paghatag.