Nasum-ok sa Venezia
Kon dili ka anad og baktas, ayaw na lang og pangambisyon nga mosuroy sa Venezia o Venice City, ulohang dakbayan sa amihan-kasadpang rehiyon sa Veneto, Italya. Ngano?
Ang Venezia dunay may gidak-ong 271,367 sq. km. lakip sa 118 ka mga gagmayng isla ug sa mainland ug kapin sa 55,000 sq. km. niini maoy ang kinapusoran sa dakbayan, apan way mass public transport system.
Maglakaw o magbaktas ang halos tanang tawo aron makaabot sa labing suok nga dapit sa mga isla nga gikutay sa kapin sa 400 ka karaan ug manindot nga desenyo nga mga taytayan.
Naglumbay usab kilid sa 150 ka kanal ang tag-as nga edipisyo nga puno sa arte nga garbusong nagbarog sulod na sa pipila ka siglo, diin ubos karon sa pag-atiman ug proteksiyon sa Unesco World Heritage Site.
Niadtong Disyembre 26, 2018, wala damha nga nasumok ako uban sa akong pag-umangkon nga si Lee Morallo Velasco sa nahisgotang dakbayan nga usa sa mga nag-u(sumala nang destinasyon sa mga turista sa tibuok kalibotan.
Gikan sa dakbayan sa Como nga nahimotang sa dako ug sikat nga lawa sa Italya, nibiyahe kami sud sa tulo ka oras padulong sa lungsod sa Cervignano, del Friuli, amihanang-silangan sa rehiyon sa Udine sa Italya nga duol sa ultanan sa mga nasod sa Austria ug Kosovo aron pagbisita sa akong laing pag-umangkon nga naminyo didtong dapita.
Apan way tren nga direct sa Cervignano. Nikanaog kami sa
central train station sa Venice. Nakahukom kami nga manuroy una ug maniudto sa dili pa molahos sa Cervignano nga usa usab ka oras sakay sa laing tren gikan sa Venezia.
Samtang, nangangha ako sa paggawas sa terminal sa tren. Makita na dayon nako ang usa sa mga dakong kanal o giilang Grand Canal.
Mga karaang simbahan. Mga mala-palasyong edipisyo. Panon sa mga kalapati nga gawasnong nakighagwa sa mga tawo.
Kalit nga nanumbalik sa akong panumdoman ang nabasa kaniadto bahin sa kasaysayan sa Middle Ages ug Renaissance Period sa Uropa.
Liboan ka mga turista ang manuroy sa naasoy nga dakbayan matag adlaw gikan sa nagkalainlaing dapit sa kalibotan, matod sa usa sa mga tindero nga nahinabi sa Superbalita Cebu.
Buhi ang daghang negosyo bahin sa serbisyo ug turismo.
Taliwala sa kabugnaw sa panahon (winter season), nasukod ang enerhiya ug panglawas sa paglakaw padulong nag-unang
landmarks sama sa St. Mark’s Square, Doge’s Palace, Dalan Realto ug Bridge, ug daghang pa.
Dunay hamugaway nga paagi sa paglibot sa Venice sakay sa
water bus apan dili makaagi sa gagmayng kanal. Ang gondola (sama sa sakayan) maoy komon nga sakyanan. Ang duha medyo dunay kamahal sa plitehan.
Ug nireklamo na ang akong tiil, busa nakahukom kami nga mobalik na sa terminal sa tren human sa 10,000 steps sa Google health nga
app sa smart phone).
Wa namo tuod malibot ang tibuok dakbayan apan dili mominos unom ka kilometros ang among nalakaw. Igo nang kasinatian sa kabus nga binuhat nga nasum-ok sa giilang “City of Water,” “City of Canals,” “City of Masks,” “City of Bridges” ug uban pang angga.
Apan duha ang akong wala mauyoni sa Venice: pagtugot sa pagpanigarilyo bisan asang dapit ug ang cover charge sa lamisa nga mogawas nga mas mahal pa usahay kaysa sa imong gikaon o giinom.
Di masukod ang akong kalipay nga nakabisita sa Italya ug pipila ka bahin sa Uropa sa panahon sa bakasyon sa Pasko 2018.
Sugo sa dakong gugma. Daghang salamat sa akong asawa nga si Jingjing nga yawe ug instrumento sa Kahitas-an nga maabot kining maong dapit sa kalibotan. Ciao! /