Wa makatandog

Sukad nilingkod si Presidente Rodrigo Duterte sa katungdanan, makadaghan na niya gisaway ang simbahang Katoliko. Di lang kay ang simbahan, apil na ang mga pari, obispo ug doktrina. Ning uwahi, iyang gihulagway ang pagtuo sa Holy Trinity nga binuang. Nganong mahimong tulo ang Diyos nga usa ra man.

Inay tubagon sa kadagkuan sa simbahan, igo ra silang niingon nga iampo si Duterte.

Kining pagpanaway ni Duterte sa simbahang Katoliko nagsugod ni sa pagpanaway usab sa kadaghanan sa kadagkuan sa simbahan sa drug war sa kagamhanan.

Grabe makapanaway ni Duterte ug iyang kasuk-an ang si bisan kinsa nga di makauyon sa iyang drug war. Mao ni ang nahitabo sa Estados Unidos, human sawaya ni kanhi presidente Barack Obama ang iyang drug war.

Bisan tuod og nanaway ang simbahang Katoliko, labina ang Archdiocese of Cebu, apan nitabang kini sa anti drug war sa kagamhanan. Kon dunay mga patay sa kampanya sa kagamhanan, ang simbahan naghatag og bag-ong paglaum ug bagong kinabuhi niadtong gustong mag-usab.

Sama sa Surrender to God (SuGod) project sa simbahan, diin liboan na ka mga durugista ang napailawom niini dinhi sa Sugbo. Bisan gani ang mga bilanggoan ila nang gisudlan aron pagkabig sa drug users ug pushers sa pag-usab sa ilang kinabuhi pinaagi sa pagbiya sa drugas.

Bisan pa niining gibuhat sa simbahan, kini wa makita ni Duterte tungod kay nagpasulabi ang iyang kasuko sa pagpanaway sa ubang kaparian sa iyang kampanya.

Hinuon, di usab ikahibung kon ingon niani ang iyang mga pamahayag. Kay ang iya baya sab main backer sa paglansar niya sa pagka presidente ug bisan hangtod karon nga naa na siya sa katungdanan, wa man magagikan sa simbahang Katoliko.

Hinuon, bisan sa sigeg saway ni Duterte, ang mga magtutuo pabiling nagsimba ug nagtuo sa Ginuo ug gitudlo sa simbahan.