Travel advisory sa UK
Posible nga morebenta na usab ang pipila ka nga local ug tourism
officials aning travel advisory nga gipagawas sa kagamhanan sa United Kingdom alang sa ilang mga citizens nga likayan ang paghiyahe sa Mindanao ug ingon man sa southern Cebu labi pa sa mga lungsod sa Badian, Dalaguete ug Oslob. Kining maong mga lungsod naila nga mga tourist destinations.
Ang maong travel advisory gipagawas sa UK human sa pagpamomba sa Cotabato City niadtong Lunes diin duha ka mga tawo ang namatay ug ubayubay ang nangaangol. Posibleng binuhatan kadto sa mga terorista. Niadtong Oktubre 2018 mipagawas usab og susamang
advisory ang UK. Dili pa lang dugay ang Estados Unidos mipagawas usab og travel advisory
sa susamang mga lugar. Kini gong mga lungsod sa south labi pa ang mga tourist destinations atbang ra man god sa Mindanao labi pa sa Zamboanga peninsula diin atoa didto ang kuta sa mga teroristang Abu Sayyaf.
Ang Abu Sayyaf nailang teroristang grupo nga mo-kidnap og mga langyaw aron ipalukat. Mga halos duha ka tuig na ang nakalabay, nakasulod sila sa lalawigan sa Bohol agi sa Inabangga. Ang tumong mao nga managit og mga langyaw. Maayo gani kay nabantayan sila sa pagsulod nila sa Inabangga ug nahitabo ang engkuwentro tali sa militar ug kapulisan. Patay silang tanan.
Ang unang mo-react aning travel advisories sa ubang mga nasud mao ang anaa sa
tourism industry kay kuno makadaot. Mahadlok na ang mga langyaw nga mobisita dinhi sa ato. Makadaot ba uroy? Mas makadaot kon adunay mahitabo nga di nato damhon. Kanus-a pa man diay kita managang? Sama god sa Bohol, kon pananglitan nakadagit kadtong maong grupo og mga langyaw unya nadala nila sa Sulu, sus, dako na kaayong problema.
Dili angay natong isalikway kining travel advisories sa ubang kanasuran kay pinasikad kini sa ilang intelligence report. Mas ngilngig sila og intelligence gathering kon itandi sa atong mga awtoridad. Unya concerned pod sila ilang citizens sa bisang asang lugar sa kalibutan. Ila gyud nga pangitaon. Dili sama sa atong gobiyerno nga pasagdan lang ang Overseas Filipino Workers (OFW) kon magkaproblema. Wala kumo kon magbantay ug mangandam tang daan.