Pagsakmit sa binulto nga drugas

Ang mga operatiba sa Cebu City Police Office (CCPO) nakasakmit og mokabat sa P400 milyones nga balor sa illegal nga drugas gikan sa Enero 1 hangtod sa Disyembre 31, 2018. Makaingon kita nga wa pa gyud mohubas ang tinubdan sa illegal nga drugas, ilabi na sa shabu.

Si CCPO Director Royina Garma niingon nga nakasakmit sila og 39,558.52 ka gramo sa shabu nga mobalor og P389.3 milyones sa gihimong 2,564 anti-illegal drugs operations nga nisangpot sa pagkasikop sa 3,953 ka mga personalities - 2,833 ka mga users ug 1,120 ka mga pushers.

Atong makita nga dinagko na ang balor ug gidaghanon sa illegal nga drugas nga nasakmit sa atong kapulisan. Apan hangtod kanus-a kaha una pa mahurot og sakmit sa kapulisan ang tanang illegal nga drugas? Diin man kaha gikan kining maong mga illegal nga drugas?

○○○

Sa tibuok tuig 2018, onse ka mga tawo ang napatay sa anti-drug operations – lima ka user ug unom ka pusher. Si Garma nisaad nga hingusgan pa nila ang ilang kampanya batok sa illegal nga drugas ning tuiga apan di siya makasaad momenos ang mapatay atol sa maong mga operasyon.

Gipahimangnoan niya ang mga kriminal nga di mosukol sa kapulisan. Ang mosukol, patay. Ang mga kriminal maoy mohukom kon gusto silang mopatay o mapatay. Matod pa ni Garma daghang mga drug busts ug ronda nga miresulta lang sa pagkasikop sa mga suspetsado kay wa man sila mosukol.

Dunay ginaingon sa Iningles nga “He who lives by the gun, dies by the gun.” Gikan ni sa karaan nga “He who lives by the sword will perish by the sword.” Pero sa tinagalog, usa ra ka pulong “nanlaban.”

○ ○ ○

Nahimong duguon ang tuig 2018 dinhi sa Sugbo. Sumala pa sa tally sa Cebu Daily News, labing menos 253 ka mga tawo ang napatay sa mga pagpamusil dinhi sa Sugbo gikan sa Pebrero 17 hangtod sa sa Disyembre 15, 2018.

Sa maong gidaghanon, 184 ang gipamusil sa wa pa mailhing mga mamumuno, kadaghanan kanila nagmaskara ug nagsakay og motorsiklo. Mao nang istrikto ang kapulisan sa mga nagsakay og motor atol sa mga checkpoints.

Ang uban napatay sa mga police operations. Kadaghanan sa napatay sa mga nagmotorsiklo wa pa masulbad.

Apan hangtod kanus-a kaha una pa mahurot og sakmit sa kapulisan ang tanang illegal nga drugas?