Bag-ong Tuig kanatong tanan
Bisan og naulahig upat ka adlaw ang akong pagtimbaya pero nag-uros-uros pa gihapon kini sa kainit. Bulahan ug mauswagong bag-ong tuig kanatong tanan!
Gipundok gyud sa Kapuso Network GMA 7 ang mga artista niini niadtong Lunes aron pagsugat sa bag-ong tuig nga mapahiyomon ug malipayon didto sa SM Mall of Asia niadtong Lunes. Nagsugod ang kalingawan sa alas 10:30 s.g.
Si Alden Richards ang nangulo sa grupo nga naglangkob nila ni Kris Bernal, Andrea Torres, Betong Sumaya, Joyce Pring ug Arra San Agustin isip mga tigpaila.
Giablihan ang kalingawan sa mga pasundayag nila ni Christian Bautista, Julie Anne San Jose, Mark Bautista, Glaiza de Castro, Yasmien Kurdi, Katrina Halili, Rocco Nacino, Derrick Monasterio, Ken Chan, Sanya Lopez, Kyline Alcantara, Thea Tolentino, Jeric Gonzales ug Jak Roberto.
Nagpasiaw sila si Super Tekla ug Donita Nose o DonEkla. Nipakita sa ilang world-class nga abilidad ang mga produkto sa mga bangga sa Kapuso Network sama nila ni Golden Cañedo, Jong Madaliday, Garrett Bolden, Josh Adornado, Nar Cabico, Kapuso boy band One Up, Kyryll Ugdiman, Anthony Rosaldo, Mika Gorospe, Esterlina Olmedo, Melbelline Caluag, Danielle Ozaraga, Muriel Lomadilla, Lyra Micolob, Psalms David, RJ Buena, JL Toreliza ug Lowell Jumalon.
Di pa gyud igo, gipakidlap pa gyud sa SM Mall of Asia ang kalangitan pinaagi sa fireworks display.
Magpasalamat ko nila ni Ms. Angela Javier-Cruz, Irene Fernando ug Gia San Pedro sa kahigayunan nga makakita sa mga pelikula nga apil sa 2018 Metro Manila Film Festival nga di na motakilid aron pagkuot sa pitaka.
Ang bosing sa Curve Entertainment nga si Narciso Chan nakauban nakog paniudto sa Lugang Café sa O Square 1 sa Greenhills. Ang kompaniya ni Boss Ciso ang nagpagawas sa bag-ong album ni Lea Salonga nga Bahaghari.
Daghang mga talents ang Curve ug nipasalig si Boss Ciso nga iya kong hatagan og updates sa ilang mga mag-aawit, artista ug uban pa.
Aron di mauwahi sama sa akong new year’s wish, karon pa lang ako nang timbayahon og happy birthday ang promo diva sa JSP Ads & Promo nga si Ms. Josie Pereyra.
Sa Enero 9 pa ang iyang adlawng natawhan. Wa pa hinoon ko ma-inform kon unsay iyang plano kay sa pagsulat nako niini, dia pa man ko sa kaulohan.
Taliwala sa kalipay ug pagmaya, mora kog gibubu-an og bugnawng tubig sa pagkadawat nako sa balita nga nitaliwan ang usa sa akong mga igsoon nga si Arthur Podot sa Danao City.
Pahulay sa kalinaw, ‘Noy Arthur, ug tagamtama ang grasya sa Labawng Makagagahum sa iyang gingharian diin wa nay kasakit ug kahingawa nga bation.