Nagdumot sa mama

Dear Papa Joe,

Tawga lang ko sa ngan nga Victor, 24 anyos. Ang akong problema kay akong mama nga nagtrabaho sa gawas isip usa ka DH. Mga 18 anyos lang ko dihang gibiyaan mi kauban sa akong manghud ug si Papa.

Sa unang tuig okay pa man siya kay manawag pa man namo ug magpadala og kwarta. Pero nagkadugay dili na siya makontak unya nabalitaan na lang namo nga duna na siyay bana-bana nga foreigner.

Naguol kaayo akong papa pero tungod kay buotan man kaayo ni, wala na lang moreklamo. Under man niya akong Papa sukad pa sa gamay pa mi. Naningkamot mig amo pero lisod na gyud ang life. Wala na ko makatiwas og school. Nanarbaho na lang mi sa akong manghod. Pero nagkasakit akong Papa tungod sa kaguol hangtud nga namatay gyud ni.

Akong gipahibawo si Mama. Gi-private message nako sa Facebook pero igo lang niyang gi seen. Sangko sa langit akong kalagot niya ug nakaingon kong og siya na pod mamatay unya iuli diri sa Pilipinas iyang patayng lawas, ako gyud patidpatiran iyang lungon. Puno sa kapungot ug pagdumot akong kasingkasing ron, Papa Joe. Sakto kaha ni akong gibuhat? Palihug tambagi ko.

VICTOR Dear Victor,

Isip usa ka human being, natural lang ang imong gibati nga kapungot ngadto sa imong mama. Pero kon imong padayunon basin ikaw madaut kay dili man ka magmalipayon kon duna kay gibating kasilag labina sa imong inahan pa gyud. Too much bitterness maglisod kag move-on.

I know lisod sa imong part ang pagsabot pero suwayi og pinsar ang tanan nga nahitabo sa inyong pamilya nga dili nimo kontrolado. Maybe duna pay mas lawom nga estorya sila si Mama ug Papa nimo nga sila lang ang nasayud.

Mas maayo pag mo focus ka sa imong future para sa imong umaabot nga pamilya.

PAPA JOE