Affair of the heart
Giwara-warahan ko ni Jake sa iyang kamot samtang nagkaduol na siya sa finish line. Nakahibawo siya kon hain kong lugara nagtindog. Malipayon kaayo ko. Siya gyud ang nakadaog sa gisalmotan niyang car race sa usa ka lugar sa north reclamation area . Lawom nang gabii. Gituyo nila ni Jake ug sa iyang mga barkada nga sa ingon aning orasa sila maglumba sa ilang awto aron di sila makadisturbo sa trapiko.
Gawas ani, gidili sab sa siyudad ang maong event. Hinuon sila ra mang mga barkada ang nag-car racing, pito sila ka buok, pulos sakop sa high society ang ilang pamilya. Aw, apil na sab ang among pamilya. Na-belong mi sa katilingban sa mga adunahan.
Nag-eskuwela mi sa inila ug eksklusibong university sa siyudad nga gidumula sa mga pari. Parehas mi si Jake nga second year college.
Daan na ming managkaila si Jake sukad pa sa among pagtungha sa haysikol kay suod man nga managhigala ang tagsa-tagsa namo ka mga ginikanan. Kini gung pulos mga datong negosyante, magkasinabot man gyud. Pulos mga negosyante sa siyudad ang tagsa-tagsa namo ka parents ni Jake.
Ug dihang third year high school na mi, nagkahinigugmaay mi si Jake. “Yahooo!”
Migakos si Jake nako dihang nakakanaog na siya sa iyang sports car kay dali man kong miduol niya. Nagdagan man gani ko ug nagpaninggit sa kalipay. Mikabyon ko sa liog ni Jake ug nagkadapat dayon ang among lips.
“Affiar in the night of two lovers.” Mikidhat si Jake nako dihang nagkabuwag na ang among mga ngabil. Mikidhat sab ko niya.
“Affair of our hearts with promise.”
Nagsinaaray man gud mi si Jake nga kami ra gyung duha. Di mi mangitag laing binuhat nga ilambigit namo sa among kaugalingon. Apan usahay di gyud nako kalikayan nga magselos kay dugukon si Jake sa mga girls. Unsaon man sab ning akong boyfriend nga naa man niya ang gipangita sa mga babaye? Tall, dark and handsome. Unya only son pa gyud sa tulo ka magsuon. Nailhan sila si Jake sa siyudad nga datong pamilya.
Hinuon, guwapa ug seksi man sab ko. Nag-workout gyud ko katulo sa usa k semana aron magpabilin ang akong madanihong figure. (SUMPAYAN)