Bag-ong tuig, bag-ong kamot

Madasigong nag-andam si Nang Konsing sa mga pagkaon ug ilimnon nga saw-an sa ilang pamilya sa Media Noche inig hagtok sa ikanapulog duha sa tungang gabii, ning bisperas sa Bag-ong Tuig. Dunay spaghetti, hamon, lumpiya, humba, kan-ong humay ug slice bread. May mga panam-is pod sama sa salad ug letse plan ug diha poy pipila ka klaseng prutas.

Alingisig kaayo ang kasarangang panimalay sa mga Escasinas sa Purok Bombil, Barangay Looc, kay gipatugtog man ni Noy Tinong, bana ni Nang Konsing, ang mga Paskohanong awit (bisag milabay na ang Pasko) gamit ang flash drive o kining nailhan nga USB.

Gani, tungod niini, lugos na nila mabati ang awit sa mga manaygonay sa unahan. Magpadayon man god ang panaygon hangtod sa Enero 6 nga maoy adlaw sa Tulo ka Hari .

Tulo ray anak sa magtiayong Tinong-Konsing - sila Marivic, Manuel ug Rolan nga bag-ohay lang nakadawat og pinaskuhan gikan sa ilang ginikanan. Nalipay kaayo ang mga bata.

Nagtrabaho si Noy Tinong sa usa ka baraderohan sa ilang dapit isip time keeper samtang si Nang Konsing nagtudlo sa barangay high school.

“Pa, mamalit tag pabuto,” hangyo sa kinse anyos nga si Manuel nianang buntaga.

“Ha? Nabuang ka?” nahasalta ang tingog ni Noy Tinong. “Pabuto god tawon. Wa ka ba mahibawo nga delikado kaayo kana? Gusto ka bang mapungkol?”

“Mag-amping lagi ko, Pa. Dili man nako kuptan inig pabuto,” pasalig sa anak.

“Bisan na. Bentaha gyung managana kay di matagna ang disgrasya, anak!”

Midason si Nang Konsing sa iyang bana, samtang ang duha ka igsuon ni Manuel nagpaminaw lang kanila.

Wa na lang mamugos si Manuel sa amahan. Apan hilom siyang mipalit og pabuto sa Barangay Babag. Nangubit siyag kuwarta sa pitaka sa amahan.

Mialingawngaw sa mga dalunggan ni Noy Tinong ug Nang Konsing ang awit nga ‘Rebentador Rock’ ni Max Surban gikan sa ilang amplifier. Nabatyagan nila nga ingon sa may mga salampati nga mingkapakapa sa ilang dughan nga nakapapha niadtong mga abog sa suliran nga nanapot sa ilang pagpuyo.

Unya miabot ang alas dose. Kusog nga misilbato ang siren sa kompaniyang gialagaran ni Noy Tinong. Mitingog usab ang mga barko nga nagpundo sa pantalan. Duol ra man god sa dagat ang ilang gipuyan. Samtang didto sa dalan nasyonal nadungog usab nila ang kusog nga pagbusina sa mga sakyanan.

Si Manuel nga misibat sa ilang panimalay human makasima-sima og spaghetti, nalingaw pagpabuto uban sa iyang mga amigong si Pakdot ug Ricky.

“Ayaw, anaa pagpabuto, Bay,” ni Pakdot pa nga nagtan-aw kang Manuel nga mipatong sa pabuto ibabaw sa bato dayong dagkot sa pabilo gamit ang putol nga katol. “Guniti sama aning among gibuhat ni Ricky, O!” Giduslitan ni Pakdot ang usa ka ‘whistle bomb’ dayong itsa.

“Mahadlok man ko, Bay. Mabuthan ‘nya ko!” ni Manuel.

Apan tungod sa kamapugsanon sa duha ka barkada nga naggalgal kaniya, nausab ang hugot nga pagdumili ni Manuel. Mikuha siyag ‘triangle’ ug gidagkutan dayong labay. Apan mitapot ang pabuto sa iyang kamot nga wala kahunawi human sa iyang pagkaon og spaghetti ganina, hinungdan nga ang ‘triangle’ didto mobuto sa iyang kamot.

Gidala si Manuel sa publikong ospital sa Lapu-Lapu ug matod sa doktor, putol na ang tulo ka tudlo sa tuong kamot ni Manuel. (KATAPUSAN)