E-JEEPNEY, E-TRIKE MAMASAHERO NA
Karong buwana na padaganon sa Dakbayan sa LapuLapu ang mga electric jeepney (e-Jeepney) ug electric tricycle (E-Trike) nga mao nay mopuli sa naandang tricycle ug jeep de pasaheroan nga nagbiyahe sa dakbayan.
Mao kini ang gitug-an ni Lapu-Lapu City Mayor Paz Radaza nunot sa pagkalangay sa pagpadagan niini.
Padaganon unta kini sa Dakbayan sa di pa motapos ang 2018, apan nalangay kini gumikan sa pipila pa ka mga giasikasong papeles sa kooperatiba nga modumala sa nahisgotang mga sakyanan.
Gikinahanglan sa kooperatiba nga iduso ang mga dokumento sa Cooperative Development Authority (CDA).
Ang United Drivers/Operators Transport Cooperative (UDOTCO) maoy gitahasan sa Land Transportation and Franchising Regulatory Board (LTFRB) sa pagdumala niining maong mga sakyanan.
“Actually this morning duna lang silay gipangayo nga endorsement kay nakuha na man nila ang paper sa CDA sa cooperative nila. Anytime na na kay gi communicate na man na sa manufacturer sa E-Jeepney naghimo na ta og endorsenent,” matod ni Radaza.
Gibutyag ni Radaza nga 100 lang una ka mga E-Jeepney ug E-Trike ang gikatakdang pada- ganon sa Dakbayan.
Mokabat sa 50 ka e-jeepney ug 50 ang e-tricycle padaganon.
Malaumon ang mayor nga maminosan na unya ang pagsud sa mga tricycle sa mga circumferential road sa dakbayan nga maoy sagad sa makamugna sa grabeng kahuot sa trapiko.
Gitug-an sa mayor nga sa pagkakaron ubay-ubay gihapon ang mga tricycle nga mosud sa circumferential road sa Brgy. Maribago ug Marigondon nga gidili gyud unta sa lagda sa trapiko sa dakbayan.
“Hopefully, ang Maribago ila nang gitan-aw, mga kolorum pa ra ba gayud, and kanang uban nga molabang diri sa Basak going straight to Marigondon mao na siyay violation. Other than that, those areas wala,” pasabot sa mayor sa pangutana kon naghitak pa ang ang mga tricycle nga mosud sa mga nagunang kadalanan sa dakbayan.
Ang pagpadagan sa mga ejeepney ug e-trike sa dakbayan tipik sa modernization program sa transportasyon ni Presidente Rodrigo Duterte. /