MGA AWTO SA MILYONARYO ‘GI-SMUGGLE’

NASAKPAN SA X-RAY MACHINE SA CUSTOMS

Upat ka luho nga mga sakyanan nga gikan sa Japan ang gipugngan karon sa Bureau of Customs Port of Cebu gumikan sa posibilidad nga paglapas sa misdeclaration human gialerto ug madiskobrehi niadtong Biyernes, Enero 4.

Ang mga sakyanan naglakip sa usa ka Porsche 911, usa ka Mercedes-Benz, usa ka Alfa Romeo ug usa ka Range Rover Evoque.

Matod ni Port of Cebu District Collector Atty. Elvira Cruz wa pay gibanabana nga balor sa maong mahalong mga sakyanan hangtod nga kini ipaubos sa seizure ug forfeiture proceedings.

Apan giisyu na ang warrant of seizure and detention (WSD) batok niini.

Sa post sa BOC PH sa Facebook page niini pagka Sabado, Enero 5, nasayran nga ang shipment gi-import sa Kylemelan General Merchandise nga dunay address sa siyudad sa Malabon.

Ang maong mga sakyanan naabot sa pantalan sa Sugbo niadtong Disyembre 19, 2018 ubos sa Bill of Lading No. 181206750071 nga gideklarar nga dunay sud nga usa ka buok car body alang sa dekorasyon.

Apan nitumaw ang pagduda dihang kini gipaubos sa X-ray inspection, diin sa scanning sa imahe sa shipment, nagpakita nga duna kini upat ka tibuok nga mga sakyanan.

Nunot niini, ang Customs Intelligence and Investigation Service (CIIS) ni-request sa pag-isyu og alert order batok sa maong kargamento gumikan sa misdeclaration nga kalapasan sa Section 1400 sa Customs Modernization and Tariff Act (CTMA). Ang request giaprobahan ni Cruz.

Gihimo ang physical eksaminasyon ni Customs Examiner Ravel Abella niadtong Huwebes, Enero 3, uban sa broker sa importer ug mga representante gikan sa CISS, Enforcement and Security Service (ESS), X-Ray Inspection Project (XIP-ESS) ug Office of the District Collector. /