Nanghigda sa sawog sa bus

Way nakitang kalapasan ang Land Transportation Franchising and Regulatory Board (LTFRB) sa Central Visayas sa nikatap nga hulagway sa social media pagka Sabado, Enero 5, nga nagpakita sa mga pasahero nga nanghigda sa sawog sa tungatunga sa sud sa bus.

Apan sigon ni LTFRB 7 Director Eduardo Montealto Jr., magpadala siya og bag-ong direktiba sa mga kompaniya og bus nga sa sunod dili na itugot ang pagpahigda sa sawog sa mga pasahero.

“Kay kanang aisle gibuhat na aron dunay maagian in case naay emergency. Unsaon man na pagagi karon sa pasahero kon masalipdan siya o naay naghigda sa tungatunga,” matod ni Montealto dihang nahinabi sa Superbalita Cebu niadtong Sabado, Enero 5.

Sumala niini ang tagdumala sa Vallacar Transit Inc., naghimo og kaugalingong pakisusi sa nag-viral nga mga hulagway nga nagpakita sa mga pasahero nga nanghigda sa sawog sud sa Ceres bus nga de aircon nga gi-post sa usa ka pasahero nga si Lyndon Placencia.

Kini nag-viral human nigawas ang balita nga mas estriktuhon sa LTFRB ug Land Transportation Office ang pagdili sa pagpabarog sa mga pasahero sud sa mga bus nga maisip nga overloading diin pamultahon og P5,000 ang operator kon masakpan.

Sumala ni Placencia nga nahinabi sa SunStar Cebu nga ang maong mga pasahero nga nanghigda sa sawog maoy namugos nga makasakay sa Ceres bus nga padung sa isla sa Bantayan, amihanang Sugbo niadtong Enero 4 sa gabii.