Kapitolyo mohatag og P3M sa Sinulog

Kapitolyo mohatag og P3 million nga financial assistance sa Sinulog Foundation, Incorporated (SFI) alang sa mga kalihukan sa Pista Senyor karong tuiga.

Kini samtang nangandam usab ang Kagamhanan sa Lalawigan alang sa float ug guest dancing contingent nga ipadala niini sa Sinulog Grand Parade sa Enero 20.

Gipahibawo ni Gobernador Hilario Davide III nga nakadawat na siya og suwat gikan sa SFI nga naghangyo alang sa financial assistance subay sa ilang mga kalihukan sa Sinulog 2019.

Moabot sa P3 million ang gisaad nga ayuda sa Kapitolyo ngadto sa SFI karong tuiga.

Matod ni Davide, dili problema ang paghatag og financial assistance kay nalakip na man kini sa ilang tinuig nga budget ug naka-liquidate man usab sa niaging mga ayuda ang SFI.

“Mao man gyud na atong palisiya dinhi, basta i-liquidate lang ba. Similar to the financial assistance that we gave also to other groups nga accredited sa Provincial Board,” padayag ni Davide.

Sa record sa Provincial Budget Office, wa nay pending financial assistance alang sa SFI diha sa panudlanan sa Kapitolyo ug nakuha na kini tanan sa foundation.

Sa laing bahin, nigahin ang Kapitolyo og hangtod P600,000 alang sa float nga ipadala niini sa Sinulog Grand Parade sa Enero 20.

Sigun sa officer-in-charge sa Provincial Information Office Ainjeliz Orong, ipakita sa ilang float ang kaanindot ug ang kalambuan nga midagayday sa mga isla nga sakop sa Sugbo.

Kini naglakip sa mga tourist destination sa Bantayan, Camotes ug bisan gani ang Carnaza island.