Kuwang og mga bus: CSBT
Mihangyo ang tagdumala sa Cebu South Bus Terminal sa Land Transportation Franchising and Regulatory Board sa Central Visayas nga dungagan na ang mga bus unit nga mobiyahe sa habagatang Sugbo.
Nakita ni Jonathan Tumulak, terminal manager sa CSBT, nga nagkuwang ang mga bus pasaheroan nga magbiyahian sa lalawigan labi na sa habagatang bahin gumikan kay nagkasaka ang gidaghanon sa mga pasahero nga mamauli sa ilang dapit kon peak season sama sa Pasko ug Bag-ong Tuig.
“Usa ana sa atong mga ebidensiya nganong nagkuwang ang atong mga bus kanang during sa mga peak season, atong miaging Pasko, miagi nga pag-celebrate sa bag-ong tuig nga dugay kaayo nga nakapauli ang atong mga pasahero tungod kay nagkuwang og pasaheroan nga bus. Tungod kay wa nay nanagan kay gipangkapoy na ang atong mga drayber, unya nag-celebrate pud sa ilang kaugalingon sa pasko,” pamulong ni Tumulak dihang nahinabi sa Superbalita Cebu pagka Biyernes, Enero 4.
Matod ni Julito “Julie” Flores, presidente sa Cebu Provincial Bus and Mini Bus Operators Cooperative, nga moabot sa kapin 400 ka bus units ang nagbiyahian sa southern Cebu.
Si Tumulak nihangyo sa LTFRB nga libkason na ang moratorium sa pag-isyu og bag-ong mga prangkisa alang sa mga bus pasaheroan.
Apan sigon ni LTFRB 7 Director Eduardo Montealto Jr., dili pa mahimo malibkas ang moratorium hangtod nga dili mahuman sa mga local government unit ang Local Public Transport Route Plan (LPTRP).