Wa pa mopakita sa kapulisan

Lima na ka adlaw sukad sa pagkamatay ni Richard Almoguera, kinsa gisukmag ni Jomil Sable, anak sa kapitan sa Barangay Suba, Dakbayan sa Sugbo, ang pamilya niini wa gihapon mopatim-aw sa buhatan sa kapulisan.

Wa kini mopahibawo kon mokiha ba sila o di.

Ang kapulisan nag-agad ra sa banay nga Almoguera kon mopasaka ba sila og kaso batok kang Jomil.

Si Richard namatay niadtong Enero 1 sa gabii sud sa pribadong tambalanan human masukmagi ni Jomil ug natumba dayon pagkapantok sa ulo sa semento.

Si Kapitan Sable nga nahinabi sa Superbalita Cebu, niingon nga naa ra sa pamilyang Almoguera kon mopasaka ba sila og kaso batok sa iyang anak.

“Wala tay mahimo. Ila man sad nang desisyon. Ang-ang naman sad kitay mangisog nga atong anak man ang sayop. Wa gyud tay mahimo. Wa gyud tay mahimo kon unsay desisyon,” tubag niya.

Iyang gihulagway ang mga Almoguera nga suod niya nga mga kabanay.

“Ako nang ig-agaw tagurha. Akong papa ug iyang mama ig-agaw tagsa,” sigon ni Kapitan Sable.

Bisan kon wa pa sila magkita sa iyang anak dihang nahinabi ning mantalaan, si Sable niingon nga sumala sa iyang nahibaw-an nagmahay si Jomil, kinsa giingon niyang nagsige og hilak.

Matod niya siya ang nigasto sa tanan nga panginahanglan sa pagpaospital ni Richard.

“Isip paryente sad nako nya kinahanglan kay kami may nakasa. Suod man sad kaayo mi anang pamilyaha kay iyang mama mao may nagpadako namo sukad pagkabata, alangan atong pasagdan,” dungag ni Kapitan Sable.