Kalit nga pagbalik

Human sa dul-an sa usa ka tuig nga wa mopakita sa publiko, si Daanbantayan Mayor Vicente Loot niadto na sa munisipyo sa lungsod. Kini base usab sa mga hulagway nga gi-post sa social media sa local government unit (LGU) sa pagpakig-uban og balik ni Loot kanila. Ang mayor gikan sa iyang taas nga bakasyon sa Estados Unidos base sa iyang mga suwat ngadto kang Gobernador Hilario Davide III. Gani, hangtod sa Enero 18 pa kutob ang pagtugot ni Davide kaniya, apan nasayo og uli ang mayor.

Wa na igkita si Loot human siya ug ang iyang pamilya gi-ambush sa mga tawo nga nagsakay og van niadtong Mayo. Iyang gipadagan ang lungsod bisan wa siya mag-anhaan sa iyang buhatan. Masabot usab nga naghimo siya og lakang alang sa iyang seguridad.

Labina human gipatay si Mayor Mariano Blanco, kinsa sama kaniya, gilambigit ni Presidente Rodrigo Duterte sa illegal drugs. Bisan gipanghimakak kini og maayo ni Loot, si Duterte magsige og hisgot niini kada bisita sa Cebu.

Apan sama sa ubang mga opisyal nga iyang gilambigit sa illegal drugs, wa gihapoy ebidensya nga magmatuod nga si Loot dunay kalambigitan sa illegal drugs. Kay kon duna pa, napasakaan na unta og kaso ang mayor.

Ning higayuna unta, duna nay mga saksi sa iyang illegal nga gihimo, sama sa mga pamahayag sa mga saksi, nga dunay direktang kasayuran kalabot niini.

Makapahibung usab ning kalit nga pagbalik ni Loot sa lungsod nga unta, nangayo man gani siyag lugway sa iyang pagbakasyon kay gusto niyang ikauban pa ang iyang mga igsuon sa Estados Unidos.

Naa ba kahay gihimong lakang ang mayor aron mawagtang ang hulga niya kay ingon sa kompyansa man siya sa pagpahibawo sa iyang pagbalik ug nitambong na og social functions. Basin baya gipakomyansa rang mayor.