Simbahan ni Digong

Misamot ang away karon tali ni Pres. Rodrigo Duterte ug sa kadagkuan sa Simbahang Katoliko human buhii sa Presidente ang iyang laing pagsaway sa simbahan. Gikuwestiyon sa Presidente ang tinuhuan sa Katoliko nga motuo sa gi-ingon nga Holy Trinity nga unta usa ra ang tuhuan, God The father. Ang mga Katoliko nagtuo sa gitawag nga Holy Trinity nga mao ang God, the Father; the Son ( Jesus Christ) ug Holy Spirit.

Taas na kaayo kon ato pang subayon kon nganong ang mga Katoliko nagtuo niini? Basta mao kana ang gitudlo nga doktrina sa simbahan sukad na-introduce ang Kristiyanismo labi pa ang Katolisismo dinhi sa nasud niadtong 15th century. Kon aduna may mo-usab niini mao lang ang kadagkuan sa Simbahan labi pa ang Vatican. Ug kon aduna may mo-kuwestiyon, iya usab na. Naa ra niya kon motuo ba siya, o dili.

Katoliko ko sama ni Pres. Duterte. Daghan usab kaayo ko og mga pangutana ning maong tinuhu-an. Apan wala man ako manaway sama sa gihimo ni Digong. Manaway ko sa mga tawo nga naa sa simbahan sama sa mga obispo ug kaparian nga nakahimo og kahiwian o ba kaha nagbinoang sa ilang katungdanan nga nakamantsa sa atong tinuhuan.

Apan kining kang Digong lahi. Gumikan kay kusganon man nga misaway ang kaparian sa pagpamatay nga nahitabo sa iyang adminisyrasyon nunot sa pagpakigbatok sa illegal nga drugas, hasta ang simbahan mismo nga maoy iyang gituhuan iya naman nga gi-ataki. Dili naman siya hinoon motuo sa mga doktrina niini sama anang Holy Trinity.

Aw, kon dili na siya motuo sa tinuhuan, pila ray pagbalhin. Balhin siya sa relihiyon sa iyang amigo kinsa nangangkon nga mao ang ‘anak sa Diyos’. O ba kaha magtukod siya og iyang kaugalingon nga tinuhuan ug ilhon nilang Ginoo mao si ‘Santo Rodrigo’. Nakagarantiya sa atong Batakang Balaod ang ‘religious freedom’. Dili gani kita puwedeng dakpon base sa atong tinuhuan basta dili lang makalapas sa balaod. Maayo siguro huna-hunaon ni Digong kon unsa ang lintunganay niining iyang pagpakig-away sa taga simbahan. Kon mamatay siya simbako, way pari momisa niya.