Kalibotanon nga pista

Karong semanaha na magsugod ang Novena sa Pista ni Senyor Santo Niño ug ang ubang mga opisyal nga kalihokan alang sa pagsaulog sa Sinulog Festival.

Alang sa kadaghanan, kining maong Pista ug Festival iyaha lang sa Sugbo. Apan, dili lang baya.

Ang pag-abot sa imahen sa Balaang Bata dinhi sa Sugbo nga maoy gigasa ni Ferdinand Magellan kang Rayna Juana dihang gibunyagan kini kaniadtong 1521, maingon nato nga maoy pagsugod sa Kristiyanismo dili lang sa Sugbo ug Pilipinas.

Ang maong hitabo maoy sugod sa Kristiyanismo sa South East Asia.

Nahitabo kini tungod sa giingong circumnavigation ni Magellan ug mga kauban sa tibuok kalibotan. Napruweba ni Magellan ang kamatuoran nga lingin diay ang kalibotan.

Buot ipasabot, ang kasaulogan karon bunga sa pipila na ka siglo nga kasaysayan.

Tungod niini, makaingon kita nga ang Sinulog kombinasyon sa lumad nga sayaw nga gihimong pag-ampo ngadto kang Hesus, kay ang imahen sa balaang bata gikan man sa Uropa. Gani, naa man kiniy kaluwa didto sa Uropa karon.

Kining maong narrative kabahin sa atong pista mahinungdanon kaayo nunot sa umaabot nga kasaulogan karong 2021, ang ika-500 nga anibersaryo sa pag-abot sa Senyor kaniadtong tuig 1521.

Dili lang kini kasaulogan sa Sugbo. Dili lang gani sa Pilipinas. Kasaulogan kini sa tibuok kalibotan.

Tuod man, dako ang posibilidad nga moanhi si Pope Francis ug ang hari sa Espanya.

MAY GANTI NA

Karong semanaha usab ilusad sa Sinulog Foundation ang labing ulahing bersyon sa Sinulog 2019 app, usa ka digital companion. Sa pagkakaron, ma-download na ang Beta sa Android version sa Google Play Store. Gihulat lang gyud ang IOS kun ang Apple version aron dungan kining malusad karong semanaha na.

Ang app mahimo na nga digital nga higala nga makatabang sa paggiya kanato aron mahimong mas makaenjoy sa Sinulog.

Pananglitan, gawas sa mga listahan sa mga kalihokan, mahimo na kitang makapili og gusto natong sigurohon sa pagtan-aw pinaagi sa bag-ong feature nga “Favorites.”

Atangi sab kay lahi sa miaging tuig, mahimo nang makadawat og mga ganti ang mga mogamit sa application, pananglit ang mo-post sa ilang mga hulagway kabahin sa Sinulog.

Depende sa mga sponsor unya, mahimo sab mo-avail og mga discount ang mga mogamit sa app.

Paagi na kini karon nga mas malingaw ang mga deboto ug namista dinhi sa Sugbo labi na ang mga batan-on ug kining mga turista.

Pinaagi niining atong Sinulog 2019 app, makaingon kita nga nagkasamot ka high-tech na ang atong pagsaulog sa tinuig nga tradisyon nga Sinulog.

Makita nato nga ang Sinulog ug ang Sugbo nagdungan sa kalamboan sa tibuok kalibotan.

Dili lang kini kasaulogan sa Sugbo. Dili lang gani sa Pilipinas. Kasaulogan kini sa tibuok kalibotan.