Affair of the heart

Miabot ang panahon nga nabugnaw si Jake nako. Nahibulong ko. Wa man koy sala niya? “Sus, insecure lang na si Jake nimo, uy, Friend.”

Mipakibo sa mga abaga ang labi kong suod nga amiga sa eskol, si Lorna. Gisumbongan ko siya sa akong problema. Aw, naproblema gyud ko sa kausaban nga pagtagad sa akong boyfriend nako. Nagesnak mi niadtong tungora sa Goldilocks sa Colon.

“Insecure?” Nataas ang akong kilay. ‘Bi, give me valid reason kon nganong nakaingon ka ana, Lor?”

“Di ba nahiabot man gikan sa Manila ang imong childhood friend? Si Dindo? So, kana maoy valid reason. Kanunay mong manuroy bisan asang lugara dinhi sa siyudad. Mangaligo sab mo sa beach. Bi, sultihi ko kon malipay ba ani si Jake nga imong trato?”

Nakapangawot ko sa akong ulo. Miyangu-yango ko. “Insecure o nagselos, Lor?” “Parehas ra na, uy. Basta di siya komportable sa maong sitwasyon.”

Nanghupaw ko. Nahunahuna ko nga dunay dakong katarongan tuod nga mabugnaw si Jake nako. Nakahibawo siya sa among mga lakaw ni Dindo. Sa wa ko pa siya sugta, gipahibawo ko na siya bahin kang Dindo nga suod gyud kaayo nako. Nagkalagyo mi si Dindo kay miadto siya sa Manila aron adto ipadayon ang pagtungha niya sa college. Ang iyang iyaan didto nga dato maoy naggasto niya.

Silingan mi si Dindo sukad pa sa among pagka bata, mao bitaw nga nagkasuod gyud mi pag-ayo. Bisag ordinaryo lang ang mga trabaho sa mga ginikanan ni Dindo apan nakapuyo gihapon sila sa subdivision nga akong gipuy-an kay bugtong anak man si Dindo ug maabot sa iyang mga ginikanan ang bayranan sa gipuy-ang balay.

Gitabangan sab sila sa iyaan ni Dindo bahin ani.

“Unsa man ni kang Dindo dinhi sa ato? Bakasyon lang o anhi na siya moeskuwela?”

Gitug-anan ko sa tinuod si Lorna.

“Anhi na siya mopadayog eskuwela sa Cebu, Lor. Kanunay man gud magkasakit si Dindo didto sa Manila, wa makauyon sa klima didto. Pero ang iyang iyaan gihapon ang mogasto niya.”

“Na, mosamot gyud ani kainsecure ug pagselos si Jake. Kaluoy sab intawon niya, uy!”

Nakatan-aw kog dugay kang Lorna. Sa akong pagsabot sa iyang gisulti, morag duna kini laing kahulogan.