Bag-ong tuig ni Bagong

Taliwala sa nagpaka-paka nga mga pabuto sa Bag-ong Tuig, may usa ka ‘successful operation’ ang bag-ong nahuman sud sa usa ka ospital sa Sugbo. Kini ang operasyon ni Bagong sa sakit nga laygay kun danlak. Dili kini laygay nga makamatay kundi sa naglaylay niang lagay nga iyang naagwanta sud na sa 34 ka tuig.

Unsaon nga sa batan-on pa siya, nagsugod na man ang iyang pagka suroyan sa nindot nga mga dapit sa Pilipinas. Ginamit ang tinigom niyang mga subra-subra sa kuwarta nga gipabawon sa iyang Papa’g Mama panahon sa iyang pag-eskuyla nga gipun-an niya sa pagpamaligyag masi, yemas ug mani aron sa matag bakasyon maka ‘tour’ siya sa mga dapit nga gusto niyang adtuon. Ug sa iyang pag ‘tour,’ di pod kalikayan nga mak-dyak siyag mga guwapa ug seksing babaye nga kauban nga iyang maibgan gamit ang iyang mga ‘green jokes.’ Usa siya ka komedyante nga ang komedya tinud-on.

Sa edad nga 16 anyos daghan siyang nabiktima nga mga tsiks. Ratatat lang buto sa iyang tubo sa M-16 raypol. Daghan pod ang naigo sa iyang 22 kalibre ug 38 kalibre. Apan sipa ang buto sa iyang kalibre 45 nga pangedaron.

Buot na lang untang agwantahon ni Bagong ang iyang kahimtang, bisag maglakaw siyang magbakaang, kay hadlok lagi siyang operahan, kay basig mapakyas ug ma-anhing siya. Nahadlok gani siya adtong ‘operation ttuli’ nga naglakip niya niadtong Grade 6 pa siya.

Nadasig lang siya sa pagpa-opera tungod sa iyang mga apo nga magngislo-ngislo ang mga nawong inigkakita niya nga nagbakaang paglakaw. Morag silay gisakitan sa iyang kahimtang. Hagbay dang miagni kaniya ang iyang mga anak nga silay moabaga sa gasto sa operasyon ug mga tambal. May mga kaila pod silang batid nga mga doktor.

Human sa operasyon miduol ang doktor kang Bagong.

“Kumusta akong operasyon, Dok?” ni Bagong sa luya nga tingog.

“Aw, puwerte ra kasayon!” matod sa doktor nga nagngisi. “Tan-awa! Lili-a!”

“Tan-awa, Pa!” matod sa mga anak ni Bagong.

“Tan-awa, Lolo!” dason sa mga apo ni Bagong.

Milingi-lingi si Bagong sa nanag-alirong kaniya. Unya gihinay niyag lili ang ilawom sa iyang habol. Ug nagpaka-paka ang kalipay sa iyang dughan sa iyang nakita. Ang sa una nga sama kini sa bola sa ‘tennis’. nahisama na lang karon sa bunga sa lansones. Busa wa niya kapugngi ang pagsinggit sa kalipay.

“Pagka bulahan sa akong Bag-ong Tuig! Naa na gyud koy bag-ong ‘two eggs!’” nakatuaw si Bagong.

“Bag-ong two eggs! Bagong kinabuhi...!” Nanganta ang mga anak ni Bagong nga giduyogan sa mga torotot nga gitayhupan sa iyang mga apo.

Mipakpak sa tumang kahimuot sila si Dr. Fred Gel ug ang iyang ‘assistant’ nga si Rick Bolingo.