'BLESSING SIYA SA AMONG PAMILYA'

Dihang nahibaw-an ni Geraldine “Gewow” Mabitag niadtong Abril 2017 nga siya nagsabak na usab sa pangidaron nga 38, siya gibati og kahadlok.

Nahadlok siya unsaon niya pag-utong ug basin dunay dautang mahitabo niya tungod sa kadugay na sa tuig dihang siya katapusan nga nanganak.

Wa siya magdahom nga siya magmabdos pa kay katapusan siyang nanganak dihang nagedad pa lang og 20, sa iyang ikaduhang anak, si Chad Noah Maglinte, kinsa 19 anyos na karon.

Samtang ang iyang kamaguwangan nga anak nga si Noreen Kaye Maglinte kay 20 anyos na karon.

Apan luyo sa kahadlok nga gibati ni Gewow, ang ikatulong anak nagdala og panalangin sa pamilya.

“Blessing gyud siya sa pamilya. Tungod niya, daghan ko og nadawat nga blessings,” paambit sa 39 anyos nga inahan, nga

loading team leader sa usa ka garments factory sa Mactan Export Processing Zone (Mepz) sa siyudad sa Lapu-Lapu.

Matod niya, normal ang iyang pagbuntis sa ikatulong anak ug hilig ug kusog siya mokaon sa mga fast-food nga kan-anan.

Apan sa ikapitong buwan sa iyang pagsabak, iyang nahibaw-an sa dihang siya nagpahiling sa doktor nga nagbabag ang bata sud sa iyang tago-angkan.

Gawas nga nagbabag ang bata, nisaka usab ang pressure sa iyang dugo nga dala sa iyang kondisyon nga gitawag og preeclampsia.

Kini ang hinungdan nga gitambagan siya sa iyang doktor nga ipaubos og Caesarean

delivery diin nasayo ang iyang pagpanganak og duha ka semana gikan sa gitakda nga petsa sa Nobiyembre 27. Samtang naa siya sa operating room, asoy ni Gewow, dugay nakuha ang bata kay nalukot kini sa kaugalingong pusod.

“Nagsige ko og pangadyi ato samtang gioperahan ko nga Lord, luwas lang mi sa akong

baby,” sigon sa ginang. Alas 2:47 sa hapon niadtong Nobiyembre 12, 2017, natawo ang bata sa Vicente Sotto Memorial Medical Center (VSMMC) ug ginganlan kini og Flavie Arya Mabitag-Omolon.

“Thank you kaayo, Lord, bahalag CS ko basta healthy ko ug ang akong baby,” mga pulong nga nalitok niini dihang nakuha na ang bata.

Si Arya nisaulog sa unang kasumaran sa iyang adlaw nga natawhan niadtong Nobiyembre 12, 2018 sa ilang pinuyanan sa Barangay Pajo, dakbayan sa Lapu-Lapu.

/ TAMPO ■ PAHIYOM SA KALIPAY: Hulagway sa malipayon nga pamilya ang makita niining larawan ni Geraldine Mabitag kuyog sa iyang mga anak nga sila si Noreen Kaye, Chad Noah ug sa kamanghuran nga si Flavie Arya nga misaulog sa unang kasumaran sa iyang adlaw nga natawhan niadtong Nobiyembre 12 sa miaging tuig.