VELARDE KAMPIYON
Nadaog sa batan-ong chess wizard sa Sugbo nga si Jerish John Velarde ang naguna niyang unom ka mga tahas sa 7-round nga kompetisyon aron ibulsa nang daan ang titulo sa boys Under-14 category sa record-breaking National Age Group Chess Tournament Visayas Leg 2019 kagahapon sa SM Seaside Cebu.
Nag-edad pa man tuod siya og 12 apan sunodsunod nga gipangdispatsar sa garbo sa Lapulapu City ang mas edaran niyang mga nakontra sa torneyo, nga adunay sanction sa National Chess Federation of the Philippines (NCFP).
Ang estudiyante sa Maria Ernestine School miagi og grabeng pinug-anay og singot sa utok batok kang Kristan Estrella una kini ningdominar sa nagsunod nga lima ka rounds batok nila ni James Ian Vega, Richard Gohetia Jr., Jervy Villarin, John Lester Belano ug John Aaron Resma.
Sa press time, si Velarde padayon pa’ng nakigduwa batok kang Joel Lawrence Hoy sa ikapito ug katapusang round.
Nagkanayon si chief arbiter Wildredo Neri nga ang torneyo mibuak og rekord sa padaghanay og mga partisipante.
“There are more participants in this Visayas Leg compared to the Grand Finals, this is the record for the tournament,” matod ni Neri sa interbyu sa Sun.Star Cebu.
“If I’m not mistaken we have around 261 players for this leg.”
Nagtuo si Neri nga daghan ang ang nakaapil sa torneyo tungod sa lokasyon sa Sugbo diin nasentro kini sa Luzon ug Mindanao.
Ang qualifiers sa Visayas leg moabante sa National Age Group Chess Tournament Grand Finals nga gikatakda karong Marso sa Zambales.
Sa grand finals, ang mopatigbabaw nga tulo sa matag division mao ang morepresentar sa nasod alang sa Association of Southeast Asian Nations (Asean)+ Age Group Chess Championships sa Myanmar karong Hunyo.