CELTICS PADAYON NGA NAGBANGIS
Bisan wala ang ilang lider nga pointguard nga si Kyrie Irving, ang host Boston Celtics padayong nagbangis ug gipanglampornas niini ang Dallas Mavericks, 114-93, kagahapon sa National Basketball Association (NBA).
Sa ikaduhang sunodsunod nga higayon, wala nakaduwa si Irving gumikan kay nagpaalim kini sa angol sa iyang mata ug ning higayuna, ang Celtics nagpakita og maayong teamwork aron angkunon ang kadaugan.
Ang Celtics, nga gikan sa dakong kadaugan batok sa Minnesota Timberwolves, 115-102, niadto lang Huwebes, nagkumboya og 35 ka assists ug 42 fieldgoals.
Tungod niini, naapod og sakto sa mga magduduwa sa Celtics ang ilang opensa pinangulohan ni Jaylen Brown, kinsa nagpakatap og 21 puntos.
Si Jasyon Tatum nidugang og 18 puntos, nihatag og 17 puntos si Marcus Smart, niamot og 16 puntos si Gordon Hayward unya midugang og 10 puntos si Al Horford.
Aduna pa’y laing upat ka mga magduduwa ang Celtics nga nakatampo og walo ka mga puntos matag usa.
“It was fun. I think when we have good spacing, we have talented players and it just makes
the game easier. If you make the right read, everybody gets
involved and it’s fun,” matod ni Hayward, kinsa nimugna sa iyang season-high 35 puntos sa kadaugan sa Celtics batok sa Timberwolves.
Gipasabot ni Celtics coach Brad Stevens nga sa ilang mga ensayo, gitutokan nila og maayo ang teamwork.
“We’ve really tried to emphasize that all year,” pasabot ni Stevens. “For the most part everybody was in a good rhythm and playing well together and seeking out the right
shot. We’ve just got to keep doing that as much as possible.”
Ang Cetlics nagpabilin sa ikalimang dapit sa Eastern Conference bitbit ang 23-15 nga rekord.
Ang Mavericks, nga nahagsa sa 18-20 nga rekord, gipangulohan ni Harrison Barnes pinaagi sa iyang 20 puntos, nitunol og 19 puntos ang pambato nilang rookie nga si Luka Doncic samtang nihatag og 12 puntos ug 15 rebounds si DeAndre Jordan.
Ning kombatiha, ang mga sumosunod sa Celtics ningpabuhagay nang daan sa ilang maayong pagpanamilit ngadto sa pambato sa Mavericks nga si Dirk Nowitzki.
Mao na kini ang katapusang duwa ni Nowitzki sa balwarte sa Boston gumikan kay nakatakda na kining moretiro human ning maong season.
Wala nahimong puntos si Nowitzki alang sa Maverickss ning kombatiha.
Sa hinapos nga bahin, ang mga tumatan-aw naninggit og Dirk! Dirk! aron dasigon ang German superstar nga makapuntos sa hinapos nga bahin apan wala kini nahitabo.
“It’s sweet when not only your home fans, but fans on the road appreciate what you’ve done for the last two decades,” matod ni Nowitzki.
“I appreciate the fans of Boston. Unfortunately, I’m really disappointed I couldn’t even make one. I had some great looks.”