Cebu naa sa top 10 destinations sa mga Taiwanese; Costas mihangop ini

Ang Kapitolyo nihangop sa pagkalakip sa Sugbo sa mga top destination alang sa mga Taiwanese national.

Gituohan sa Provincial Tourism Office nga ang maanindot nga mga beach ug ang kaduol lang sa Sugbo o Pilipinas sa Taiwan maoy hinungdan nga ganahan sila nga mosuroy dinhi.

Ang online travel company nga Expedia nitaho nga ang Sugbo maoy usa sa 10 ka mga siyudad nga labing sikat nga holiday destinations alang sa mga Taiwanese traveler.

Dugang sa Expedia, nakatampo sa amor sa mga Taiwanese tourist pagduaw sa Pilipinas mao ang paglusad sa barato nga airline flight.

Taas sab ang ilang demand alang sa bed-and-breakfast, nga maoy sagad gitanyag dinhi sa Sugbo.

Matod ni Provincial Tourism Officer Boboi Costas, di ikapadaplin ang posibilidad nga ganahan ang mga Taiwanese

sa beach sa Sugbo hinungdan nga daghan kanila ang mobakasyon dinhi.

Dugang niya, dako usab nga factor ang kaduol lang sa biyahe gikan sa Taiwan ug sa Pilipinas.

“It’s a welcome development specially nga it’s a short trip from Taiwan to Cebu. So, I expect that there will be a lot of tourists. Kay ang trend man

gud gani karon sa travel is shorter distance. People now would love to go to destinations which are near compared sa mga long haul nga mga travel,” padayag ni Costas.

Si Bise Gobernador Agnes Magpale nalipay sa maong kalambuan, ilabi na kay wa pay direktang koneksiyon tali sa Sugbo ug sa Taiwan.

Bisan gani sisterhood agreement sa bisan unsang probinsiya o siyudad sa maong nasud, wala pa ang Sugbo.

“Sa Cebu province, wala pa ta’y sisterhood agreement ana nila and neither are they members of East Asian Tourism Forum (Eatof) pero one China na man na sila karon. Makadungog gyud na sila ug feedback about Cebu,” matod ni Magpale. Masaligon ang Kapitolyo nga mokita ug makamugna og trabaho alang sa mga Sugbuanon ang padayon nga pag-anhi sa mga Taiwanese tourist sa Sugbo.

Sa pagka-karon, ika-6 ang mga Taiwanese nationals sa mga turista nga daghan dinhi sa probinsiya. Pabiling naguna ang Koreans, ikaduha ang Japanese, ika-tulo ang Chinese, ika-upat ang American nationals ug ika-lima ang Australian tourists.

“They book bed-and-breakfast which will benefit the community-based or local businesses. Di ba ang bed-and-breakfast usually are owned by locals. I would suppose that they would stimulate the economy,” matod ni Costas.