Affair of the heart
Gitan-aw ko ang oras sa akong selpon, alas diyes sa gabii. Wa gyud ko batiag katulugon samtang naghigda ko sa akong kuwarto. Mibangon ko ug milingkod sa ngilit sa kama. Every now and then manghupaw ko. Wa gyud ko magdahom nga mahimong complicated ang sitwasyon namong tulo ni Jake ug Dindo. Nalipay ko sa pagpauli ni Dindo sa Cebu kay nagkakita mi, ug labaw kong nalipay pagkahibawo nga anhi na siya mopadayog eskuwela sa Cebu.
Apan kining tanan mao diay ang makahatag og problema nako. Labi na kay nangulitawo karon si Dindo nako. Porbida sab ning sitwasyona? Nahasol gyud ko pag-ayo. Wa man sab nako balibari si Dindo ganina sa iyang gugma nako? Unsay buot ipasabot ani? Nga love sab nako siya?
God! Di ko gustong tawgog duhay nawong. Hilom kong nakaingon.
Sa akong paminaw kadlawon na kong nakatulog. Gitawgan ko si Lorna sa selpon, gusto kong makigkita niya. Daghan kong isulti niya bahin namong tulo ni Jake ug Dindo. Nagkita mi pagkahuman sa among klase anang pagka hapon. Nangaon mig ice cream sa SM.
Nakapanglingo ang akong amiga nga mitan-aw og dugay nako.
“Na, unsaon na man lang ani ron, Joan? Aw, nganong wa man sab nimo balibari si Dindo, uy, nga uyab man unta mo si Jake. Morag imong gipalaom si Dindo ani?”
Lawom kaayog panghupaw si Lorna. Nakapangawot ko sa akong ulo. Morag gusto na gyud kong mohilak. Aw, mitulo gyud ang akong mga luha nga gidali kog pahid sa akong tudlo.
“Naglibog bitaw ko sa akong kaugalingon, Lor. Nahigugma ba ko kang Dindo nga wa man nako siya balibari sa iyang gugma nako nga naa man unta si Jake nga akong uyab?”
“Na, ikaw ra gyuy nakahibawo ana, Joan. Ikaw may nagdala sa imong kaugalingon, ikaw may labaw nga nakahibawo sa imong gibati ngadto kang Dindo?”
Naghilom na lang ko kay naglisod kog sulbad sa problema nga miabot nako. Nakigpamauli na ko kang Lorna kay niadtong tungora gabii na.
Lawom na kaayo ang gabii dihang mitingog ang call alert sa akong selpon. Barkada ni Jake ang nagtawag. Hapit ko mabuhii sa kakugang ang gikuptan kong selpon tungod sa iyang gipahibawo nako.
(SUMPAYAN)