MGA HUGAW SA OSPITAL GILABAY SA DAGAT SA LAPU
Patubagon ug pamultahon sa kagamhanan sa dakbayan sa Lapu-Lapu ang hospital management, kansang napamatud-an nga naggikan sa ilang tambalanan ang naglutawlutaw nga medical wastes sa kadagatan sa Barangay Ibo, Lapu-Lapu City.
Nasuta nga di lang usa ka private hospital maoy tinubdan sa maong mga hugaw, adunay lain pang pribadong hospital nga nahimutang sa Mandaue City base sa nakolekta nga basura, diin adunay ngalan sa tambalanan.
Nihangyo ang Dakbayan sa Lapu-Lapu nga pugngan lang una ang ngan sa ikaduhang tambalanan.
Ang unang tambalanan mao ang Chong Hua Hospital, nga niklaro nga gikontrata nila ang usa ka pribadong kompaniya aron mohipos sa ilang mga basura nga medical.
Gumikan sa kabalaka, nipatawag og meeting si Mayor Paz Radaza sa mga department heads nga hingtungdan, aron nga kahatagan og dinaliang aksiyon ang maong sitwasyon.
“Ang sa atoa lang, we will be asking them (hospitals) to explain og nganong naabot sa dire sa amoa (medical waste) ,” matod ni Radaza, kinsa naalarma.
PADAD-AN OG NOTICE
Si Atty. Ethelbert Ouano, sa city attorney’s office, namahayag nga mopadala sila og notice to explain sa hingtundang mga tambalana ug gitagalan og lima ka adlaw sa pagtubag.
Gikatakda nga kagahapon sa hapon, Enero 8, gipadala ang maong notisya.
Moluwat sab ang City Environment and Natural Resources Office (Cenro)citation tickets.
“We will be asking them to explain as to why and how it happened nga naabot na diri sa Lapu shore kining ilang mga hugaw. Pagkasunod amo silang isyuhan og citation tickets that is SOP and indeed it’s a clear violation nga naghugaw hugaw gyud sila sa dagat,” matod ni Ouano.
Matod pa ni Ouano sa dihang gi-post niadtong Facebook user ang namatikdan nga medical wastes sa kadagatan sa Barangay Ibo human gi-tag sa maong post ang mga kaila niini nga city hall official niadtong Sabado, Enero 5, nipadala gilayon ang siyudad og sanitary inspectors aron sa pagsusi sa maong mga basura.
Nasuta nga infectious medical waste ang nakolekta, sama sa syringe ug dagom niini, vial nga aduna pay dugo, kidney basin, reservoir bags, container sa dextrose ug uban pa.
LAIN NAPALGAN
Samtang usa ka concerned citizen sa Sityo Apro, Barangay Ibo nanawag og tigbalita sa dihang plastic bags nga gisudlan sa intravenous hose nga aduna pay dugo, syringes, test tube nga adunay marka nga HEP B ug ginamit nga adult diapers gidagsa sa baybayon.
Ang hepe sa Cenro, Rodirico Tagaan, kinsa niadto sa dapit, nihulagway sa basura nga makadaut ug makatakod og sakit.
Matod niya nga ila unang i-treat ang nakolekta nga basura sa di pa hingpit nga ilabay.
Ang Lapu-Lapu City mopadala og representante sa Environmental Management Bureau (EMB) 7 sa ilang ipatawag nga technical conference kalabot niini aron usab nga ilang ipakita ang ilang inventory ug record sa ilang nakolekta nga medical wastes.
NAGSUSI SAB
Ang CHH, sa ilang pamahayag nga gipadala sa SunStar Cebu, niingon nga nagpahigayon usab sila og kaugalingong imbestigasyon.
Matod sa representante sa tambalanan nga ang ilang biohazard waste ilang gi-outsource sa Davao City Environmental Care Inc.,accredited sa DENR.
Andam silang makigtambayayong alang sa imbestigasyon.
“We intend to revisit our outsourcing processes and audit protocols to ensure the highest compliance to the DENR regulations and standards as well as protect the safety and welfare of the general public and our environment,” matod sa pamahayag.
DOH MOABAG
Andam ang Department of Health (DOH) 7 nga motabang sa Lapu-Lapu City kabahin niining isyu sa napalgan nga mga biological waste sa baybayon sa maong syudad.
Matod ni DOH 7 Regional Director Jaime Bernadas nga makahatag og technical assistance ang ilang ahensiya kon kinahanglanon sa local government unit sa Lapu-Lapu. /