UYAB, 65, MIPATAY, GAHIKOG
MANAG-UYAB NAKAPLAGANG PATAY SA MGA PINUSILAN SULOD SA HOTEL
Mura ra og nangatulog ang manag-uyab nga sila si Ely de la Cruz Malagum, 65, ug Danica Rose Eroyla, 22.
Sa naandan niya nga posisyon kung matulog, nagubo si Eroyla. Si Malagum nagtakilid nga gaatubang ni Eroyla. Gahabol sila katunga sa ilang mga lawas ug naggunitay og kamot.
Si Eroyla adunay pinusilan sa tuong bahin sa ulo, samtang si Malagum, sa walang bahin sa ulo.
Ang kapulisan nagtuo nga gipusil una ni Malagum si Eroyla dayon gisunod niya ang iyang kaugalingon.
Pasado alas 9 sa gabii niadtong Lunes, Enero 7, nakadawat og tawag ang Waterfront police station labot sa napalgang duha ka lawas sa sulod sa kwarto sa usa ka tourist inn nga nahimutang sa V. Gullas Street, Barangay Sto. Niño,
Cebu City.
Si Malagum, kinsa nailhan pinaagi sa iyang lisensya, taga Makati City, samtang si Eroyla taga lungsod sa Tuburan, Cebu.
Matod ni Waterfront police chief Sr. Insp. Jomar Pomarejos, niadto pang Enero 5 nag-inusarang ni- check in si Malagum ug gitakda unta nga mo-check
out udto niadtong Enero 7. Natingala nalang ang management nga wala kini mogawas ug gipasusi sa roomboy.
Gipugos sa roomboy og abli ang pultahan kay wa may nitubag sa iyang pagtuktok ug gi-double lock sa sulod.
Nakakuha ang mga imbestigador og usa ka Glock 45 pistol nga gigunitan pa ni Malagum.
Wala silay nabantayan nga nagubot ang kama niini nga nagpamatuod nga wala mosukol si Eroyla sa dihang nahitabo ang krimen. “We are still waiting for
the result of the crime lab sa giimbestiga sa Soco, ang paraffin ang ballestics, nag-request pud tag firearms verification kung kinsay tag-iya sa armas, then kadtong fired cartridge i-examine pa to kung usa ra ba gyud ka armas ang nakabuto
didto,” matod ni Pomarejos. Lakip sa ilang sutaon ang CCTV footage sa hotel kung unsa orasa misulod si Eroyla sa kwarto aron mahibaw-an nila kung unsang orasa posibling gihimo ang pagpamusil.
Nagduda ang mga imbestigador nga sa dihang gipusil ni Malagum si Eroyla natulog kini nga maoy hinungdan nga walay nahitabong komusyon sa sulod.
Dili usab mabati ang buto sa armas sa gawas tungod sa ka baga sa bongbong sa kwarto.
Ang igsuon ni Eroyla nga si Mercy Labrador mi- claim sa lawas sa iyang manghod sa punerarya ug mikompermar nga manag-uyab si Malagum ug Eroyla. /