Wa masayod sa pagkatawo sa uyab sa iyang manghod

Kumbisido si Mercy Eroyla Labrador, igsuon ug nagsilbing inahan ni Danica Eroyla nga gipatay ni Ely Malagum ang iyang igsuon sa wala pa kini maghikog.

“Basin sa tan-aw niya wala na siyay kapaingnan unya kon mangita na og lain akong manghod. Wa ta kahibaw, basin nagselos gyud,” matod ni Labrador.

Gikompirma sab ni Labrador nga dugay nang karelasyon ug kaipon ni Eroyla, 22, ang 65 anyos nga si Malagum.

Nakaila ni Eroyla si Malagum sa gitrabahoan nga restawran sa Maynila niadtong 2015.

“Unya sa pag-ila-ila, iya kong gipahibaw nga nag-ipon na sila. Mag-upat na ka tuig,” matod ni Labrador. Nibalik si Eroyla sa Sugbo usa katuig ang milabay tungod mopahuway gikan gioperahan sa appendicitis. Si Malagum ang nisuporta ni Eroyla sa mga pinansyal nga panginhanglan ug kanunay nga mobiyahi si Malagum paingon sa Cebu aron bisitaon ang iyang igsuon.

Apan bisan pa sa kadugayon na sa relasyon nila ni Malagum ug Eroyla, wa gihapon masayod si Labrador sa pagkatawo sa uyab sa iyang manghod.

“Dili man ni siya moadto sa amoa. Ang akoang manghod ra ang moadto sa pension house unya mouli ra sad kung molarga na og balik sa Manila ang lalaki. Kakita ko ani niya kausa pero sa sulod ra sad sa taxi. Nagka-istorya mi sa cellphone ra,” matod ni Labrador.

Matod ni Labrador nga niadtong Disyembre 27, 2018 ulahi niyang nakita iyang manghod.

Wala siya nagdahom nga naabot na kini sa Cebu City tungod kay ang pagtuo niya naa pa ni sa Tabuelan nibisita sa iyahang singko anyos nga anak nga babae.

Si Eroyla adunay singko anyos nga anak sa unang karelasyon sa dihang 17 anyos pa kini.

Ilahang gikabalak-an og unsaon nila pagpahibaw ang ilang inahan kabahin sa pagpanaw ni Eroyla. Naproblema si Mercy og unsaon niya paghatag og desenteng lubong ang iyahang igsuon tungod sa ilahang kawad-on. Nahimutang karon ang lawas ni Malagum sa St.Francis Funeral Homes tungod kay wala pay tag-tungod ang nikuha niini. /