WA DUAWA SA INAHAN
Dalagita kinsa nireklamo sa usa ka pari human madapati, usa usab ka deboto sa Sr. Sto. Niño.
Usa sa iyang kanunay nga pangaliya ang maayong panlawas sa iyang inahan ug ang mailhan na ang amahan.
“Mag-pray ko nga unta maguli na akong mama ug papa. Maayo lang ang panlawas sa akong mama,” matod pa sa 15 anyos nga si Angel (dili tinuod ngalan).
Si Angel mao ang batan-on nga nireklamo nga gidapatan ni Fr. Decoroso Olmilla sa Canduman, dakbayan sa Sugbo, sa pagsugod sa tuig 2019. Siya hangtud karon temporaryo nga nagpuyo sa balay dangpanan sa buhatan sa Mandaue City Social Welfare and Services.
Gitug-an ni Angel sanglit ang iyang inahan nahimo na nga kusinera ni Fr. Olmilla sukad sa iyang pagkabata pa, kanunay siya nga makasimba ug nag-ila kang Sto. Niño.
Gani pangandoy niya nga makasaksi sa himuon nga pagduaw sa imahe sa Sto. Niño uban sa Birhen sa Guadalupe diha sa St. Joseph National Shrine Parish atol sa traslacion sa sunod semana.
Nakahilak nga giangkon sa dalagita nga gimingaw siya sa iyang inahan kinsa wala na niya makita sukad niadtong Disyembre 28, adlaw sa pagpasaka og kaso batok sa pari.
Iyang gipangaliya nga magkauban sila og balik ug unta dili na sa poder ni Fr. Olmilla.
“Miss na nako siya, maayo unta duawon nako ni mama .
I love you, mama,” mensahi sa naghilak nga dalagita ngadto sa iyang inahan.
Iyang gitug-an nga nagsugod nga madapatan siya sa pari sa niaging tuig lang, human nga anaa na ang mga iro sa pari.
Tres anyos pa lang siya sa dihang nagtrabaho na ang iyang inahan isip tigluto sa pagkaon ni Fr. Olmilla.
Iyang gihulagway nga palangga siya pari kaniadto, gani mao kini ang nitabang nga siya makatungha.
Apan bisan pa man niini, gitug-an ni Angel nga desidido gyud gihapon siya sa pagpasaka sa kaso batok ni Fr. Olmilla.