Unsay kinahanglanon sa vendors atol sa Sinulog
Midagsa ang mga manindahay nga gustong molukat og permits ngadto sa Cebu City Hall kagahapong adlawa alang sa umaabot nga Sinulog 2019.
Si Ian Briones, Community Organizer sa Division for the Welfare of the Urban Poor (DWUP), mibutyag nga mikabat na kapin sa 300 ka mga manindahay ang narehistro sa ilahang opisina sa unang adlaw pa lang sa pagsugod sa rehistrasyon.
Ang maong rehistrasyon nagsugod niadtong Sabado ug mahuman kini karong Sabado.
Matod ni Genevieve Alcoseba, operation head sa Division for the Welfare of the Urban Poor (DWUP) , nga gihimo nilang prayoridad ang mga manindahay nga rehistradong botante diri sa siyudad sa Sugbo apan siya nagkanayon nga hatagan gihapon nila og higayon ang mga gustong maninda nga dili rehistrado sa siyudad.
“Priority nato ang registered voters, but gidawat man lang pud nato ang dili registered kay ang reality ana dili man jud na tanan taga Cebu City. Sinulog is for whole Cebu man, it’s not just about Cebu City," pagpasabot ni Alcoseba.
Dugang ni Alcoseba aduna sila’y mga butang nga dili nila itugot nga ibaligya sa mga rehistradong manindahay, sama sa liquors, flying balloons, ug uban pa nga makadala og samok sa kadalanan.
“Anything nga maka occupy ug maka obstruct sa kalsada gibawal nato kay as much as possible atong sigurohon nga han-ay
ang kadalanan,” sigon niya. Importante sab nga musunod sa saktong pamaagi sa pagkuha og health card ang mga gustong maninda og mga
street foods, sama sa barbeque, pungko-pungko ug uban pa tungod kon wala sila niini dili sila mahatagan og permit para makapaninda.
Mibutyag si Alcoseba nga ilahang dakpon ang di musunod sa ilahang gihimong patakaran.
“If ever dili sila mo sunod sa mga protocols atong dakpon, kon madakpan iyang lukaton ang iyahang mga goods, dili sad siya ka lukat unless dili siya ka seminar, hasol na kaayo, may nalang nga mo follow gyud sa guidelines.”