Kay sayop man

Tungod sa ilang excitement tingali, nakalapas sa procedure sa Philippine National Police (PNP) ang lima ka mga sakop sa Talisay Police Station nga nakadakop ug nakasakmit og illegal drugs. Hayan labing una kadto nilang nakakuha og ingon adto kadako nga balor sa illegal drugs ug sa ilang kalipay, usa nila nag selfie samtang nangukay sila sa mga ebidensya.

Polisiya diay sa kapulisan nga di magpakita sa ilang nawong ang mga sakop sa Drug Enforcement Unit (DEU) tungod kay kuyaw ang ilang trabaho. Nag-una nilang tahas mao ang anti-drug operations. Kining trabahoa nagkinahanglan og intelligence gathering busa kinahanglan di sila mailhan.

Bisan tuod og maayo ang ilang katuyoan, apan makadaut ra usab kanila ang ilang gihimo kay nakita na man ang ilang mga nawong ug medyo maklaro bisan nagmaskara pa sila.

Apan di makiangayon nga basulon ang mga sakop sa media nga nag-post sa mao nga hulagway kay ilang gi-post kini sa social media nga makita sa publiko. Gihanap man o wa ang hulagway nga gigamit sa media, ang orihinal nga hulagway sa ilang post sa pulis nakita sa publiko.

Di unta angay nga basulon ang media kay ang problema wa magsugod sa mga tigbalita, kon di, ang tinubdan sa problema mao ang nagpahulagway ug ang nag-upload sa hulagway nga wa maghuna-huna sa mamahimong linugdangan sa ilang gibuhat.

Klaro ug simple, ang mga pulis nga nagbuhat niini wa makahuna-huna sa ilang gibuhat. Maayo ang intensyon sa ilang pagpakita sa resulta sa ilang kakugi. Apan ang linugdangan sa ilang pagkuha og hulagway ug pag-post sa social media nga nagpakita sa ilang kaugalingon maoy di tungod kay nagrisgo sa ilang tahas ug responsilidad isip pulis ug kalapasan sa ilang procedure.

Kay nasayop man sila, gibalita man sa media o wa, nakalapas sila sa procedure sa PNP busa gisilutan.