Mobalik ang ROTC ning tuiga?

Nagkakulba ang dughan karon sa mga tinun-an sa high school tungod sa hugon-hugon sa pagbalik sa ROTC (Reserved Officers Training Corps) sa school curriculum.

Compulsory ni sa katapusang duha ka mga tuig sa K-12 curriculum. Apan, mag-agi una ang mga tinun-an og 4-year PMT (Preparatory Military Training) o kaha CAT (Citizens Army Training).

Namatngunan man gud sa nakaagig ROTC nga di sayon ang maong training nga sagubangon sa lawas. Sa among panahon kada Dominggo ang training.

Diha ko mabutang sa model platoon. Ang nakuha mao kadtong taas ang grado sa theoretical exams. Kargado diha sa platoon, mga eskolar sa academics.

Nisamot ang kahugot-estrikto sa among training nga usahay nagbasol ko nganong naapil sa model platoon. Tiamo na, whole-day ang drill ug uwahi ming mamuhi sa hapon.

Tungod kay anha ang adlaw mosubang sa among nawong (7:00 AM) ug mosawop sa among buko-buko (5:30 PM), gianggaan namog ROTisngi ang maong training.

Apan dakog natabang sa akong pagkatawo ang ROTC sa disiplina ug kinaiya nga way -atrasay. Kining akong pagka aguwantador (resilient) labi na sa han-ay sa mga pagsuway gikan sa ROTC.

Nakat-on kog paggamit paggubag .45 cal., Garand, Carbine, ug machine gun sa training. Kanunay mig praktis shooting sa mga armas sa firing range sa Campo sa Army sa Lahug.

Seryuso tong among training sa ROTC sa 60’s sa South- western University (SWU). Estrikto kaayo ang among komandante nga gikan sa PMA nga magdala-dalag stick nga ibunal namo kon masayop mi.

Pagsud sa 80’s ngadto sa 90’s nisud na ang kurapsiyon sa ROTC. Mamayad na lang ang mga anak sa dato. Nidagsang ang pangilad. Nibayad ang anak sa akong silingan, apan ilad lang.

Tibuok nasod ang kurapsiyon sa ROTC. Hinaot mabantayan ni sa mga awtoridad sa tulonghaan kon mobalik man ugaling ang ROTC training sa mga tinun-an.

Compulsory ni sa katapusang duha ka mga tuig sa K-12 curriculum.”