Bag-ong sistema sa LTO

Gusto sa Land Transportation Office (LTO) nga usbon ang pamaagi sa pagbag-o sa lisensiya sa mga driver pinaagi sa pag-dawat lang og online sa mga medical certificate gikan sa accredited nga mga clinic ug mga doktor.

Gihimo kini aron pagsumpo sa peke nga mga medical certificate nga mikatap karon.

Dili malalis nga maayo ang katuyoan sa LTO.

Dili ikalimod nga daghang mga alisto nga mga negosyante ang mipakatap sa mga peke nga mga medical certificate tungod kay daghan usab nga mga aplikante ang gusto og instant nga serbisyo.

Dili usab ikalimod nga dakong negosyo kining pag-renew sa mga lisensiya sa mga driver. Mao kini hinungdan nga miandar pod ang utok sa mga swetik aron dali maka-kwarta pinaagi sa paggama og peke nga mga medical certificate.

Apan dunay problema kini. Makalangan kining maong paagi.

Ngano man? Dyotay pa ang mga clinic ug doktor nga gihatagan og accreditation gikan sa LTO.

Ang resulta--daghan ang mo-apply o mag-renew sa lisensiya unya dyotay ra ang pwede mo-issue og medical certificate.

Tungod niini, madugay o malangan na sab ang pag-proseso sa mga papeles sa mga aplikante sa lisensiya.

Ang angay unta buhaton dili usa i-implementar kining maong bag-ong sistema.

Ang unahon paghimo sa LTO mao ang pag-proseso usa sa mga aplikante nga mga clinic o doctor samtang nagpadayon ang LTO sa pagdawat sa mga application o renewal sa lisensiya.

Kon makompleto na ang pag-accredit, anha pa nila buhaton ang bag-ong pamaagi.

Mentras dili pa kompleto ang pag-accredit, padayonon usa ang daan nga sistema aron dili maapektohan ang serbisyo sa LTO ngadto sa katawhan.

Kumusta na kaha kadtong mga namayad sa LTO alang sa plaka sa ilang mga sakyanan apan hangtod karon wala pa mahatag sa LTO ang plaka? Ngano kaha nga nangobra pa man ang LTO sa bayad sa plaka nga nasayod na man sila nga dunay problema sa paghimo ug pag-deliver sa mga bag-ong plaka? Asa na man ang mga gipangbayad sa mga tawo nga wala makadawat sa plaka? Kon giuli kini, nauli ba ang tanan ngadto sa mga namayad o nauli lang ang pipila ka buok, samtang ang uban wala pa? Dili ikalimod nga dakong kantidad ang nahatag sa mga katawhan alang sa plaka sa sakyanan. Kon totalon kini sa tibuok nasod, hayan mokabat gyod kini og pipila ka bilyon ka pesos.

Kon gideposito kini sa bangko, asa man padung ang interest niini? Maayo unta og dunay makapasabot niini.

Sa pag-abri sa bag-ong tuig, init nga isyo dayon ang misugat sa katawhan.

Ug mao kini ang isyo nga gibato ni House Majority Floor Leader Rolando Andaya batok kang Budget Secretary Benjamin Diokno.

Matod pa ni Andaya, dunay kalabotan si Diokno nga nakakuha og minilyon nga mga proyekto sa DPWH ang iyang mga kumpare ug kumare sa Albay ingon man ang mga dummy nga mga korporasyon niini.