Parks dili interesado sa PBA?

Dili man tuod sugwak apan igo na kaayo ang crowd nga misaksi sa unang duwa sa Asean Basketball League (ABL) dinhi sa Cebu nga gipahigayon sa Hoopsdome sa dakbayan sa Lapu-Lapu niadtong Dominggo.

Dili sab kulbahinam ang duwa tungod kay dominado man sab kaayo sa San Miguel-Alab Pilipinas ang bisitang Zhuhai Wolf Warriors aron kuliton ang 105-95 nga kadaugan.

Sa kadaugan, ang Alab maoy bugtong team nga wala pa makaangkon og kapildihan sa lima nila ka duwa nga igo na kaayong naghatag kanila sa solong liderato.

Samtang ang Warriors nangiwit nga may 1-9 nga baraha nga mihaom sa ikanapulo nga puwesto.

Daghan ang naikag nga mitan-aw sa maong panag-engkuwentro aron linawas usab nilang makita ang ilang mga idolo nga mga star players sa Alab, ilabi na si Bobby Ray Parks, ang higanting import nga si PJ Ramos ug ang nakontrobersiyal nga si Renaldo Balkman.

Aduna pay laing duwa ang Alab Pilipinas sa Hoopsdome ug kini batok sa Saigon Heat karong Pebrero 3. Ang Saigon adunay 7-4 nga baraha ug anaa sa ikalimang luna.

Karong gabii ang San Miguel makigsangka sa Chesports Dragons sa Malaysia ug dayon sa petsa 11 sila na usab ang mo-host sa Eastern.

Gip-it ang schedules sa Alab kay tiaw mo bay aduna pa silay walo ka games karong buwana.

Pero ang nakakuha sa akong atensiyon mao kining sitwasyon karon ni Parks kinsa nisalmot sa PBA Rookie Draft sa niaging buwan ug nakuha isip no. 2 pick overall sa Blackwater.

Ang Blackwater nagpanikad na nga malakip sa ilang official lineup si Parks apan hangtod karon wala pay kasabutan nga nakab-ot ug wala pay kontrata nga napirmahan ang matag habig. Mosugod na ang ika44 nga season sa PBA karong Dominggo.

Si Jimmy Alapag, ang coach sa Alab, sa atong interview, hugot nga namahayag nga magpabilin si Parks sa team hangtod mahuman ang tibuok season sa ABL.

Apan iyang giangkon nga wa siyay kasayuran kon unsay arrangement tali sa Blackwater ug sa manager ni Parks nga si Charlie Dy.

Nagdumili usab siya sa pagtubag sa dihang gipangutana kon posibling mahitabo ba ang buyout sa kontrata ni Parks.

Kining sitwasyon ni Parks way kalahian sa nahitabo kaniadto ni Alex Cabagnot. Si Cabagnot nakuha sa Sta. Lucia pero wala sab mopakita ug wala mopirma og kontrata sa team hinungdan nga na ban siya og usa ka tuig sa PBA.

Dili kaha mahitabo usab kini ni Parks? Moapil sa PBA drafting unya wa diay klaro kon moduwa ba sa team nga mokuha kaniya? Magsilbi unta ning leksiyon sa PBA.

Did-an sa pagsalmot sa drafting ang players nga aduna pay kontrata sa laing team. Lisod na og magpirme.