MIRAKRAK MAOY NAMATAY
GIBASLAN SA MGA PULIS; 1 SAMDAN, 1 NADAKPAN SA RAID SA TOLEDO CITY
■ WARRANT: Gipusasan sa Provincial Drug Enforcement Unit (PDEU) si Teodolo Juarez Inseso (wala), 36, human sa giingong pinusilay tali sa mga awtoridad nga mo serve unta og warrant of arrest sa Barangay Kampo 8, Toledo City, Biyernes sa buntag, Enero 11. Makita sa sulod sa balay ang lawas ni Remegio Caballero Atillo, 53, kinsa giingong maoy nangrakrak sa mga pulis gamit ang Armalite rifle, apan nabaslan hinungdan sa pagkamatay. Estorya sa pahina 2.
Usa ang patay samtang usa ang samaran sa giingong engkwentro tali sa mga sakop sa Provincial Drug Enforcement Unit (PDEU) sa Cebu Provincial Police Office sa pag-serve unta og
warrant of arrest sa giingong mga kriminal sa sitio Canapnapan, Barangay Campo 8, syudad sa Toledo, Biyernes sa buntag, Enero 11.
Patay si Remegio Caballero Atelio, 53, taga Campo 4, siyudad sa Talisay. Samdan si Mharnin Caballero, 18, ug gidala sa ospital sa dakbayan sa Sugbo.
Siya naigo sa luyong bahin sa lawas.
Nadakpan usab ang iyang kauban nga si Teodolo Juarez Inseso, 36, nagpuyo sa maong dapit.
matod ni Sr. Insp. Alejandro Batobalonos nga nakaikyas ang ilang leader nga si Jerome Labitad, giila nga most wanted
person sa probinsya sa Sugbo. Sila si Labitad ug Atelio mao ang subject sa warrant of arrest sa kasong paghupot og illegal drugs ug ilegal nga paghupot og mga armas nga giisyu ni Regional Trial Court Branch 65 Judge Glenda Go sa Dakbayan sa Talisay. Ang unang kaso way piyansa. Matod ni Batobalonos nga si Labitad giila nang drug lord.
Pasado alas 5 sa buntag ila una nga i-serve ang warrant of
arrest sa duha, kalit lang nigawas kini si Atelio ug nangrakrak sa mga sakop ni Batobalonos gamit ang M16 Armalite rifle, apan way nangaigo kanila.
Ningbawos ang mga pulis ug naigo sa nagkadaiyang bahin sa lawas ug ulo si Atelio.
Namatay diha-diha si Atelio.
Sa dihang gi-clear na nila ni Batobalonos ang dapit, nakurat sila nga adunay 10 anyos nga lalake sa sulod sa balay.
Ang bata nisuksok sa ilawom sa katre.
“Pwerti namong kurata pag
clear na nga naa diay bata sa sulod. Maayo gani wala ni siya maigo kay sa pagpusil aning namatay, mibawos dayon mi paingon aning balaya,” matod ni Batobalonos.
Nakakuha ang kapulisan og usa ka M16 Armalite rifle ug upat ka magazine niini, usa ka kalibre .45 nga pistola ug usa ka 9mm pistola ug lima ka medium packs sa gituohang shabu nga motimbang og 25 grams. Ang mga pinakete nga illegal
drugs didto nakuha sa mga sakop sa Scene of the Crime Operation (Soco) sa bulsa ni Atelio. Mobalor ang tanan sa P170,000.
Ang inahan sa 10 anyos niangkon nga kanunay sugoon ang iyang anak nilang Labitad ug suholan hinungdan didto kini mag pirme.