POLICE ESCORTS MAG-VEST NA: SINAS
Kinahanglan magsul-ob na og bulletproof vest ang mga pulis nga mo-escort og dinakpan nga ubos sa ilang kustodiya inig gawas sugod sa Huwebes, Enero 10.
Gimando kini ni Police Regional Office (PRO) 7 Director Debold Sinas human maluwas ang duha ka mga pulis nga ni-escort sa kanhi sinaligan ni Franz Sabalones nga napatay sa pagpamanhig sa Barangay Bulasa, lungsod sa Argao niadtong Miyerkules, Enero 9.
Matod niya, swerte nga nagsul-ob og bulletproof vest ang usa sa mga pulis nga si PO3 Ruel Patalinghug nga ni-escort ni Tocelio Ababon, dihang naigo sa luyo human paaraki sa armadong mga tawo ang ilang gisakyan nga patrol car.
Siya nibutyag nga duha ka mga anggulo ang ilang gitanaw sa ambush.
Una, nga nag-away-away ang mga miyembro sa grupo ni Sabalones ug ikaduha, dunay utang si Ababon. “Kay kato ra ba diayng namatay murag usa to sa mga
close-in (security) at saka trusted aide ni Franz Sabalones. Tapos dako ang nakuha nga shabu sa iyaha, basig gipangita nato aha ang kita. Naay internal squabbling sa ilaha,” sigon ni Sinas nga
nahinabi sa mga tigbalita human sa unang misa sa nobenaryo sa Basilica Minore del Sto. Niño, pagka Huwebes, Enero 10.
Iyang gitahasan si Cebu Provincial Police Office (CPPO) Director Manuel Abrugena nga imbestigahon ang maong hitabo. “We’re very interested because
duha namo ka pulis didto is naalaan, nga madamay unta na. Maayo gani naay vest. That
is why starting karon, akong estoryahan ang mga pulis nga once mo-escort mo og person under custody iggawas dapat naka-proper vest attire sila for their protection,” dugang ni Sinas. Siya nagtuo nga planado ang maong ambush kay giatangan ang sakyanan sa pulis kon asa moagi.
Si Ababon, lumad nga taga Barangay Tabunok, siyudad sa Talisay, apan nibalhin sa Barangay Casay, Argao, ang motambong sa iyang hearing sa korte sa Argao human siya masikop niadtong Disyembre 29, 2018 atol sa buy bust operation.
Atol sa interogasyon, si Ababon nihatag og mga pangan sa mga opisyal sa kapulisan sa rehiyon ug pipila ka mga personalidad nga duna siyay koneksyon sa iyang operasyon sa gidili nga drugas.