San Fernando hayan ma-Ewas gyud

Posibleng molig-on ang basehanan pagpabilin sa lungsod sa San Fernando isip usa sa mga dapit nga naa sa election watchlist areas (EWAS) sa probinsiya.

Kini kon mogawas usab sa imbestigasyon sa kapulisan nga may bulok-politika ang pagpatay kang Konsehal Reneboy Dacalos, kinsa magpasubli unta karong Mayo.

Sigun sa Commission on Elections (Comelec) nga kon drug-related sab kini, di kini hatagan og gibug-aton pag-classify sa lungsod isip usa sa mga EWAS.

Anggulo sa drugas maoy gitan-aw nga motibo sa pagpatay kang Dacalos, human giingong kabahin sa drug matrix sa self-confessed drug lord nga si Franz Sabalones.

Dunay mga spekulasyon nga bantayanan gihapon ang lungsod sa San Fernando niining nagsingabot nga pinili-ay tungod sa susamang krimen.

Apan gipadayag ni election officer Ferdinand Gujilde nga molig-on lang ang basehanan pagpabilin sa lungsod sa listahan sa mga dapit nga makonsiderar nga EWAS kon mogawas sa imbestigasyon sa kapulisan nga politically-motivated ang pagpatay.

Ang San Fernando lakip sa dul-an 30 ka mga dapit sa Central Visayas nga una nang natumbok sa kapulisan ug sa Comelec nga posibleng ipaubos sa EWAS tungod sa kasaysayan sa election violence ug giingong presensiya sa mga armadong grupo.

GITOKHANG

Si Sr. Insp. Arvi Arbuis, hepe sa San Fernando police, nagkanayon nga sa iyang pagkahimong hepe sa lungsod, nasayod na siya nga nalakip sa listahan si Dacalos hinungdan ilang gipaubos sa oplan tokhang.

Apan nagdumili kini sa pag tahan sanglit iya pang ikonsulta sa iyang abogado ug wa usab kini mihimakak nga nalambigit siya sa illegal nga drugas.

“Considering nga naa sa watchlist, pag-abot sa amoa, amo gyud siya gi-convince nga mag surrender. Amo siyang gitokhang. Three times ang attempt namo. Ang pulong lang gyud niya kay iya pa kunong ikonsulta sa iyang abogado,” matod ni Arbuis.

Samtang Special Investigation Task Group umolon sa Cebu Provincial Police Office aron pag-ila kinsa ang nagpaluyo sa pagpatay kang Dacalos. Ang maglangkob sa SITG mao ang San Fernando police station, Provincial Investigation and Detective Management Branch, PNP Crime laboratory, Criminal Investigation and Detection Group-7 ug Police Regional Office (PRO 7).