Hilaw nga imbestigastyon

So, gipamulta ang Davao City Environmental Care Inc. (DCECI) ug ang Chong Hua Hospital (CHH) human mamatud-i nga ilegal kining nanglabay sa ilang basura sa kadagatan sa dakbayan sa Lapu-lapu. Ang DCECI, ang kompaniya nga maoy tighakot ug tiglabay og basura sa hospital, pabayron sa Environmental Management Bureau (EMB) 7 og P250,000 samtang P110,000 sa CHH.

Sa ilang pakisusi ang maong kompaniya didto mideritso og labay sa basura sa dagat ug wala sa ilang pasilidad .

Atong gihangop kining desisyon sa EMB 7 nga gipangulohan sa regional director nga si William Cunado.

Pero mora man og haw-ang ug hilaw ang ilang imbestigasyon kay bisan gani ang mga opisyal sa DCECI ug sa Chong Hua natingala ug nahingangha kon nganong ang ilang basura didto man nahipunta sa dagat.

Ang Chong Hua pananglitan, natural lang nga moreklamo sa maong hitabo kay wa man gyud silay kasayuran niini kay ang ilang obligasyon mao ra man ang pagbayad sa kompaniya nga ilang gikontrata.

Pero kon ang DCECI, ang kompaniya nga maoy nanguntrata, mao na gani ang manghunaw ug moingon nga wa silay kalabutan niini, kini makapatingala.

Dinhi unta itutok ug tugkaron sa imbestigasyon sa EMB 7 aron matino kon kinsa gyud ang responsabli niini.

Kon di sila, sa ato pa, adunay laing nakahimo og kalapasan nga maoy angay pahamtangan usab og silot.

“Na-shock mi,” matod sa opisyal sa DCECI kinsa mipadayag nga ilang gisunod gyud ang mga lagda sa Department of Environment and Natural Resources (DENR) kay mahadlok sila nga makuhaan sa lisensiya.

Sa laktod pagkasulti dili lang ang multa maoy siguroon sa EMB 7 kon dili ipalutaw kon kinsa ang nakasala aron maoy masilotan alang sa kaangayan.