Nalusno ang tore ni Davide

Gikwestyon sa National Heritage Commission of the Phil. (NHCP) ang planong katukoran sa 20 ka andanang Provincial Resource Center nga gihulagwayng Tore ni Davide sulod sa Capitol compound.

Kalapasan sa balaod sa heritage conservation kay ang Kapitolyo nga gitukod sa 1937 gideklarar sa NHCP nga National Heritage Landmark sa 2008 atol sa unang hugna sa pangalagad ni Gov. Gwen Garcia.

Ubos sa NHCP Law makaluwat og cease and desist order kon ugaling ipamugos sa pagpabarog. Marso 2017 si NHCP Chairman Rene Escalante mipadala og sulat ngadto ni Provincial Administrator Mark Tolentino nga nagrekomendar nga tukoron ang maong proyekto distansya sa perimeter sa Kapitolyo aron dili matandog ang historical value.

Mitamihid sa maong sulat tataw nga kalapasan sa Code of Conduct ang Ethical Standards for Public Officials (RA 673) nga kinahanglan tubagon sulod sa 15 ka adlaw. Nob. 2018 gidasonan og sulat si Tolentino nga dili ipadayon ang pagtukod kondili makasumitir og new development plan.

Sa Omnibus Election Code o Batas Pambansa 881 nagdili sa implementasyon og proyekto sulod sa 45 ka adlaw sa dili pa ang eleksyon aron pagpugong sa pundo sa gobyerno alang sa katuyoan sa piniliay.

Hinuon ang election ban gitakda sa Comelec sa Marso 29-Mayo 12, 2019. Apan kay padulong sa piniliay maisip nga pamintaha o katahapan nga mahimong fund raising.

Unya mangutang sa DBP og 1.5B pesos nga mabuktot og bayad ang mga magbubuhis sa proyekto nga dili prayoridad nga unta daghang kadalanan nga wala maatiman, district hospitals nga walay tambal ug kuwang sa mga doktor.

Sa habig sa Provincial Board gipugngan pa ang paghatag og authority sa gobernador pagpirma og kontrata sa nakadaog sa subasta nga WT Construction. Ingon man dili ma-award sanglit wala pay availability of funds.

Paglingkod ni Davide grabing nakasaway sa WT nga maoy nagtrabaho sa CICC sa pasangil nga sub-standard ang materyales nga gigamit. Giusap ni Davide ang iyang pulong ug gitulon og balik ang kaugalingong laway. Pwede ra man unta og Public-Private Partnership (PPP) nga walay gasto ang gobyerno.

Nganong mangutang man pod nga richest province man kaha ang Sugbo.

Kon dugang opisina ang gikinahanglan nganong dili man ipaayo ang BAEX ug Palace of Justice nga gibakanti kay nadaot sa linog. O kaha ipaayo ang mga bakanting opisina sa Kapitolyo human ang mga board members ug vice governor namalhin sa bag-ong legislative building.

Posibli nga makasohan kon ipamugos sa pagtukod. Busa wala pa gani kasugdi ingon og nalusno na ang Tore ni Davide.