THUNDER GIPAHILOM SA SPURS

Nagkinahanglan pa og duha ka mga overtime ang host San Antonio Spurs una nila nadispatsar ang Oklahoma City Thunder, 154-147, kagahapon sa NBA.

Ang Spurs nanginit sa threepoint area apan dili kini paigo, nagkinahanglan pa sila og dugang paninguha, butang nga nahatag ni LaMarcus Aldridge.

Si Aldridge nagpakatap og iyang career-high nga 56 puntos aron pangulohan ang Spurs.

“He carried us,” asoy ni Spurs pointguard Derrick White kabahin kang Aldridge.”It was fun to watch.”

Sa maayong gipakita ni Aldridge, nausik ang paningkamot ni Russell Westbrook, kinsa mihatag og triple-double nga 24 puntos, 24 ka assists ug 13 ka rebounds alang sa Thunder.

“He’s been a beast all year long,” paghulagway ni San Antonio coach Gregg Popovich kang Aldridge.

“He anchors us at both ends of the floor. He did it last year, and he’s doing it this year, too. He’s just been fantastic. Obviously, he had a great night.”

Nagkanayon si Aldridge nga taodtaod na sab siyang nakapangutana sa iyang kaugalingon kon nganong wala pa siya nakahimo og 50 puntos ug mao na kini ang nagsilbeng tubag.

“I was just complaining about (not scoring 50 points) like two weeks ago,” asoy ni Aldridge.

“That I feel like it should have happened in my career.”

Ang Spurs ningposte og franchise record dihang napasulod nila ang nag-una nilang 14 ka mga itsa sa threepoint land. Sa kinatibuk-an, mitali sila og 16 of 19 ning maong dapita.

Hinuon alang sa Thunder, wala sila’y angayang ikauwaw sa kapildihan gumikan kay nakasugakod gihapon sila og insakto bisan grabe ka init sa duwa sa Spurs.

“For it to go down to the wire with a team that’s hot like that, we have a lot to take away for us, for how we played,” asoy ni Oklahoma City forward Paul George.

Ang Thunder nakatilaw sa ilang ikapitong sunodsunod nga kapildihan sulod sa balwarte sa Spurs.

Gipangulohan ni George ang Thunder pinaagi sa iyang 30 puntos.