Hain na diay si Sabalones?

Human mapatay ang duha ka gituohang mga linya ni Franz Sabalones sa Argao nga si Tecelio Ababon ug ning bag-o lang si San Fernando Municipal Councilor Reneboy Dacalos, gipa monitor na usab ni Police Regional Office (PRO) 7 Director Debold Sinas si Sabalones.

Matod ni Sinas nga ang kapulisan sa Central Visayas nangita usab sa self confessed drug lord apan nagsugod na silag paniid kon asa na kini karon.

Una nang gitug-an ni Sr. Insp. Arvi Arbuis, kanhi hepe sa San Fernando police station, nga nakadawat silag impormasyon nga magbisitahan kini sa ilang balay apan giingong molakaw ra usab dayon.

Apan si Sinas nakadawat og report nga mibalik sa ilang naandan nga negosyo ang mga gaway niini.

Usa sa mga kasaligang tinubdan sa PRO 7 nitug-an sa Superbalita Cebu nga wa na sa Camp Crame si Sabalones ug giingong magbalhin balhin kini sa syudad sa Sugbo ug San Fernando.

Ilabi na karon nga nag hinangat na ang eleksyon ug dako ang posibilidad nga ang kwarta gikan sa illegal nga drugas magbaha na usab.

Matod ni Sinas nga nitug-an kaniya si Mayor Lakambini Reluya nga si Sabalones mi finance sa mga politiko sa lungsod sa San Fernando.

“The last time bisan si Mayor (Reluya) niangkon sa interview nga previously gyud si Sabalones help funds sa mga candidates sa southern Cebu. So, thats why we are preparing,” matod ni Sinas.

Wa na moklaro si Sinas kinsa kadtong mga kandidato kaniadto nga gisuportahan ni Sabalones sa iyang kwarta aron lang modaog sa eleksyon.

Apan aduna na silay impormasyon kung kinsa kini nga mahimong nalakip sa listahan ni Department of Interior and Local Government Secretary Eduardo Año.