Nganong wala na gi-renew ang 17 ka JOs?

Giangkon ni Gob. Hilario Davide III nga tuyo niyang wala na ipa-renew ang 17 ka job order employees (JOs) gikan sa buhatan sa nagkadaiyang board member.

Kini human nga nisobra na sila sa 11 ka mga organic employee nga gitugot alang sa matag bokal ug ang budget sa buhatag sa gobernador maoy gikuhaan sa sweldo sa maong mga JO.

Matod ni Davide, common sense nalang usab nga dili na siya mo-renew kanila, ilabi na karon nga nagkaduol ang piniliay sanglit posible nga dili kini motrabaho alang sa Kapitolyo kundi alang na sa personal agenda sa mga bokal.

Wala direktang gipahayag sa gobernador nga panimalos maoy iyang tumong sa wala na pag-renew sa 17 ka mga JO gikan sa buhatan sa nagkadaiyang board member.

Apan giangkon niya nga nahiubos siya sa pipila ka mga bokal nga kalit lang nibali sa ilang suporta labot sa gitinguha nga Provincial Resource Center bisan ug una na silang nipadayag ug suporta niini.

Nagtuo ang gobernador nga nakapausab sa hunahuna sa mga bokal ang pagka-klaro na sa political lines nunot sa nagsingabot nga eleksiyon.

Una, gipadayag ni Davide, nga ang maong mga empleyado nisobra na sa 11 ka mga organic personnel nga gitugot alang sa matag bokal.

Gawas niini, isip mga JO mahimong undangon ang ilang serbisyo bisan unsang orasa ug ang ilang sweldo gikuha pa gyud sa budget sa iyang buhatan busa siya maoy dunay prerogative pag-renew o dili kanila.

Dili gusto si Davide nga mag-sweldo ang iyang opisina sa mga tawo nga tua nisuporta sa politikanhong ug personal nga agenda sa mga board member nga ilang gi-alagaran.

“Ang-ang naman ug this people will work for me, adto gyud na sa ilang gidapigan. It’s just common sense ba. Mo-sweldo ang Kapitolyo ining mga JO nila nga dili gani sympathetic and will not be working for us but for them, the other side. Sila mismo they know this fact. Kahibalo ni sila niini,” niingon si Davide.

Wala masayod si Davide kung unsa na unya ang mahitabo sa pagbalik sa sesyon sa Hunta Probinsiyal sa Enero 21.

Kahinumduman nga sa wala pa nag-recess ang PB sa miaging buwan, inisyal na silang nakahimo ug botasyon, diin 6 ang mga bokal nga nisupak paghatag ug awtoridad sa gobernador pagsulod ug kontrata tali sa winning bidder alang sa pagtukod sa resource center, walo ang ni-uyon ug duha ni-abstain.

Dili makasiguro si Gob. Davide kung ang wala pag-renew sa JO sa mga board member mao na ba ang katapusan sa mga dili na i-renew nga mga empleyado. Matod ni Davide, regular ang pag-review sa performance sa mga kawani sa Kapitolyo.

“Wa’y siguro ang casuals tingali. We are reviewing right now. In fact, dili man lang ni (karon). Constantly, our HR, our department heads are reviewing the performance of their subordinates kay mao man na’y basis. Katong mga casuals pud, every 6 months man pud. Kanang JO klaro man na sa ilang terms of commission sa ilang pag-engage nato. Wa man na silay security of tenure. They can be removed anytime,” padayag ni Davide.