Gob mipahimangno sa mga drayber alang sa kasegurohan sa bus ning Sinulog

Mga nagmaneho og public

utility vehicle, ilabi na ang mga bus gikan sa kalungsuran nga magdala og mga deboto ug mga dumoduong paingon sa dakbayan sa Sugbo, giawhag ni Gob. Hilario Davide III pagsiguro nga anaa sa maayong kondisyon ang ilang mga sakyanan.

Kini aron makalikay sa disgrasya, ilabi na nga daghan sa mga taga-probinsiya ang manganhi sa siyudad aron mosaksi o motambong sa mga kalihukan sa pista senyor.

Alang kang Davide, panahon sa pagpasalamat ang mga kapistahan nga susama sa Sinulog. Mao kini hinungdan nga daghan gyud ang mga modagsang dinhi sa dakbayan sa Sugbo panahon nga saulogan ang pista sa Senyor, pahinungod sa Balaang Bata.

Sa nasayran, ang Cebu South Bus Terminal bukas (CSBT) hangtud karong Sabado sa gabii apan, sirhan kini inig alas 12:00 sa tungang-gabii sa Dominggo.

Temporaryong ibalhin ang terminal sa El Pardo St. sa Cebu South Coastal Road tungod sa pagsiran sa N. Bacalso Avenue diin naa ang CSBT.

Bisan ang mga jeep ug taxi nga mohakot unya sa mga pasahero nga maabot sa temporary terminal paingon sa Basilica ug ubang bahin sa dakbayan, lakip sa gipahinumduman ni Davide nga mag-amping o maghinay-hinay lang sa biyahe.

“Keep your vehicles always road worthy. Maglikay ta’g disgrasya kay daghan ra ba gyud nga kaigsuanan nato mangari diri (sa Cebu City), manan-aw sa parade, mag-novena. So hinay lang, ampo kanunay,” padayag sa gobernador.

Sa laing bahin, ang Kapitolyo nakahatag na ug assistance sa pipila ka mga contingent gikan sa probinsiya nga mosalmot sa Sinulog karong tuiga.

Matod ni Davide, nihatag ang Kapitolyo ug P2 milyones sa dakbayan sa Bogo, nga una nang ni-request alang niini. May gihatag sab nga vehicle assistance ang Kapitolyo sa lungsod sa Daanbantayan ug lakip na usab sa Bogo ug Ginatilan.

Ang mga contingent gikan sa Bogo, Ginatilan, Consolacion, Talisay ug Carcar una nang ni-apil sa Sinulog sa Kabataan sa Lalawigan niadtong Sabado ug mobalik sila sa grand parade karong Domingo. Laing contingent gikan sa probinsiya mao ang Tribu Kandaya sa Daanbantayan, nga maoy defending

champion sa free-interpretation category.

“Bogo asked before, P2 million man tingali unya gipakapinan nato for their vehicles kay katong dancers nila, kinahanglan man ug sakyanan to fetch them, to bring them here unya balik,” sigun ni Davide.