Eleksyon na!
Sugod. Niadtong Dominggo, Jan. 13, nagsugod na ang panahon sa piliay apan ang mga kandidato di pa makapangampanya kay sa Pebrero 12 hangtod sa May 11, 2019 pa ang gitakda nga panahon alang sa mga kandidato pagka-senador ug party-list samtang ang mga kandidato pagka kongresista ug sa mga lokal nga opisyales sa Marso 30, 2019 pa magsugod ang kampanya hangtud sa Mayo 11, 2019.
Niadtong gabii sa Dominggo daghan na ang nadakpan sa kapulisan uban sa taga Commission on Elections (Comelec) atol sa checkpoint nga ilang gipatigayon sa nagkalain-lain nga dapit. Usa ka pulis nga nadakpan didto sa Daanbantayan nga nagdala og pusil nga walay exemption gikan sa Comelec. Matod pa escort siya ni Cong. Benhur Salimbangon.
Duha ra ka butang nganong dunay nadakpan nga pulis niadtong gabii sa Enero 13, adlaw sa pagsugod sa election period. Primero, posible nga wala makahibawo sa taho. Ikaduha, nakahibawo apan gibaliwa lang labina kadtong namuyo sa mga kalungsoran kay nagtuo nga di pa ipatuman ang gun ban. Sa atong mga abay ug higala, karon nakahibawo na gyud mo nga gi-implementar na ang gun ban.
Niadtong Dominggo nagsugod ang election period. Sa Pebrero 12 pa magsugod og kampanya sa kandidato pagka senador ug party-list. Ang mga kongresista ug mga lokal nga mga kandidato magsugod og kampanya sa Marso 30 hangtud sa May 11. Sa Mayo 13 ang piliay.
Di ba kahibulongan nganong mubo ra ang gihatag sa Comelec nga panahon alang sa pangampanya? Unya, bisan tuod giingon nga election period na karon apan ang gipatuman mao ang gun ban ug ang pagdili sa pangampanya. Abi ninyo ngano? Tungod kay nakahibawo na ta ug ang Comelec nga dugay na nagsugod og pangampanya ang mga kandidato.
Dinhi sa lokal, ang uban nga interesado modagan ug kadtong magpasubli nagsugod na og suroy-suroy sa ilang mga distrito bisan wa pa gani wa pa makasumitir sa ilang sertipiko de kandidatora (COC). Karon nga piliay kay wala may apil ang presidente atong makita ang katag sa mga kandidato sa lokal, kongresista ug senador. Kon makakita mo nga ang atong kadalanan sa highway giguba bisan maayo pa ang semento o espalto kay usban og semento o espalto nakasabut na mo ngano. Nagpasabot ni nga eleksyon na gyud.
Apan hangtod karon wa pa ko kadungog sa plataporma de gobyerno sa mga kandidato. Ang kadaghanan sa atong madungog sa radyo mao ang atake sa mga kandidato. Di sama kaniadto sa dekada 60 nga ang hisgotan sa mga kandidato mao ang ilang plataporma de gobyerno. Karon, ang kadaghanan sa kandidato kutob ra sa saad.
Sa Dominggo, Enero 20, na ang Sinulog. Manghinaut ta ug mangaliya ni Senyor Sto. Niño nga walay mga kadaut nga moabot atol sa pagsaulog. Pit Senyor!