Kings gilihian og daog, gipukan ang Ka Tropa
Gisugdan sa Brgy. Ginebra Gin Kings ang ilang kampanya sa Philippine Basketball Association (PBA) 2019 Philippine Cup pinaagi sa pagbuntog sa Talk N’ Text KaTropa, 90-79, niadtong Dominggo sa gabii sa Philippine Arena sa Bocaue, Bulacan.
Nagkumboya ang mga higanteng sila si Greg Slaughter ug Japeth Aguilar aron dugkatan ang maayong gipakitang duwa sa Gin Kings sa labing unang kombati sa bag-ong season sa liga.
Ang Gin Kings nakaposte dayon og 6-0 nga labaw ug wala na sila motugot nga mailog sa KaTropa ang bintaha hangtod na sa katapusang gutlo.
Human nakapanghudlat ang KaTropa, usa ka 18-9 run ang gimugna sa Gin Kings sa pagsugod sa 4th quarter aron inaton ang ilang labaw ngadto sa 81-66.
“Opening game is always tough because it is a long day,” matod ni Cone.
“Your guys are standing around a lot and it’s hard. You can always start lethargic and we are not in great shape as we are. We’ve got real good talent, we know what we want to do, but sometimes we get tired.”
Gipangulohan ni Aguilar ang kadaugan pinaagi sa iyang 21 puntos samtang nidugang og 15 puntos si Slaughter.
Ang KaTropa gipangulohan sa Sugbuanong si Roger Pogoy pinaagi sa iyang 21 puntos ug 16 rebounds, nihatag og 17 puntos ug 10 assists si Jayson Castro samtang nitampo og 14 puntos ang laing Sugbuanon nga si Brian Heruela.
Hinuon wala si Troy Rosario sa TNT sa maong duwa.
Matod pa sa taho, nga sa sunod buwan pa makaduwa si Rosario tungod sa pagka injured sa ilong niini atol sa ilang scrimmage batol sa NLEX Road Warriors sa niaging bisperas sa bag-ong tuig.
Ang injury, matod pa, nagkinahanglan og taas nga pahuway.
Puntos matag usa
Ginebra (90) – J. Aguilar 21, Slaughter 15, Mercado 11, Thompson 9, Ferrer 9, Mariano 6, Tenorio 5, Devance 5, Teodoro 4, Cruz 3, Caperal 2
Talk N’ Text (79) – Pogoy 21, Castro 17, Trollano 15, Heruela 14, Reyes 6, Cruz 4, Williams 2.