Hugot nga pagsuway ni Tepora
Unom na lang ka adlaw sa dili pa ang away, apan hangtod karon wala pa makakuha sa iyang timbang si World Boxing Association (WBA) interim world featherweight champion Jhack “El Kapitan” Tepora.
Ang 25 anyos nga Tepora (22-0, 17 KOs) modepensa sa iyang titulo batok sa beterano ug dekalidad nga Mexican ighter nga si Hugo Ruiz (38-4, 33KOs) sa undercard sa away ni Manny Pacquiao-Adrien Broner karong Dominggo didto sa MGM Grand, sa Las Vegas.
Sa pagkakaron, si Tepora motimbang pa og 137 lbs., sa ato pa sobra og 11 lbs. alang sa 126 lbs. nila nga away. Ug aron makuha, kinahanglan motibhang siya og 2 lbs. ka adlaw gikan karon.
Dili bag-o alang ni Tepora ning ingon aning sitwasyon, kay mao kini sagad nahitabo sa niagi niyang mga away.
Ang iyang maguwang ngs si Christopher “Pingping” Tepora kinsa maoy iyang original trainer ug kuyog niya karon didto sa US, masaligon nga kaya ra kaayong makuha ni Jhack ang iyang timbang.
Gibutyag ni Pingping nga ang pagpakunhod na lang sa timbang sa iyang manghod maoy ilang gitrabaho karon ug gani wala na sila mopahigayon og sparring didto kay ila na kining gikompleto sa dinhi pa sila sa Sugbo.
“Gikompleto naman namo ang sparring session diha sa Cebu. Ang iya na lang timbang maoy among gilihok karon. Kaya ra ni, naa pay unom ka adlaw,” matod ni Pingping sa atong online interview.
“Naami plan A ug plan B. Plan A namo amo sa puntoson. Kung tan.aw namu malupeg mi sa puntosay, amoa na gyud sudlon,” dugang ni Pingping.
Kini maoy unang away ni Jhack sa Estados Unidos ug sa akong tan-aw kini maoy pinakalisod niyang sagubangon sukad sa iyang pagka profess ional ighter.
Kini si Hugo Ruiz, 30 anyos, usa sa giilang battle-tested nga Mexican ighter. Ang record lang daan, nagtug-an sa iyang eksperiyensiya ug kalidad. Lig-on ug adunay igong kapabilidad nga makapaundang sa kontra.
Tiaw mo bay, sa 38 ka daog, 33 niini gipang-knockout.
Usa sa iyang higpit nga nakontra ang iyang kataganasod nga si Julio Ceja (30-1). Sa ilang unang away, alang sa WBC superbantamweight title, na-knockout ni siya sa ikalima ka round.
Apan sa ilang rematch, iyang gipakamang si Ceja sulod lang sa usa ka round aron angkunon ang WBC superbantamweight belt.
Nakaaway na usab ni siya ni Hozumi Hasegawa sa Japan alang sa WBC superbantamweight title apan napildi sulod sa ikasiyam ka round.
Pero bisan pa man niining impresibong record ni Ruiz, naobserbahan nga sa upat niya ka pildi, tulo niini pulos knockout.
Buot pasabot nga dunay parti sa iyang lawas nga kon maigo dili siya makaagwanta. Dili sama sa ubang mga Mexican fighter nga gawas nga lig-on, bisan og kapila pa matumba mobangon og mopadayon ug motiwas sa away.
Kini maoy usa sa iyang weakness. Kon kini maoy maestudyohan sa kampo ni Tepora, labing siguro mouli si Jhack nga magpabilin sa iyang hawak ang titulo.
Go for it, Jhack…Goodluck!