Pagpangandam

Nasayod na kita nga mosiaw ang sunog sa panahon nga nagsingabot ang Fire Prevention Month--Marso. Nagunang hinungdan mao ang kauga sa palibot tungod sa kainit sa panahon nunot sa nagsingabot nga summer ug kusog nga huros sa matag-karon-ug-unya. Dali lang mosiga o modusit ang kayo ngadto sa dakong sunog.

Apan ang maong kahimtang dili kontrolado bisan sa labing batid nga tawo o sayantipiko sa emerhensiya. Mugna kini sa kainaiyahan nga daw kawatan, dili matag kanus-a mahitabo sama sa ubang kataladman. Dili kita mawad-an og paglaum human gihatagan og lantip nga panutok sa Magbubuhat. Duna kitay mahimo.

Ang makanunayong pagpangandam batok sa emerhensiya dako og matabang. Ang pagplano sa pagpuyo uban sa pagtahod sa kinaiyahan ug katilingbanong plano sa pagpuyo nga dunay konsiderasyon alang sa sayon nga paglihok panahon sa katalagman. Ning bahina, mawala o kaminosan ang pagkalas og kinabuhi ug pagkaala sa kabtangan o bahandi.

Kagahapon, Enero 5, dili mominos tulo ka mga sitio sa Barangay Ermita, dakbayan sa Sugbo ang naigo sa sunog. Atol ning pagsuwat, gikataho nga 500 ka mga balay naabot sa sunog. Pila kaha ka pamilya ang apektado ug danyos? Dako. Niadtong Enero 4, Dominggo, 145 ka mga balay ang naugdaw ug daghang angol sa sunog sa Pardo, dakbayan sa Sugbo ug Tanke, dakbayan sa Talisay.

Ang komon nga sitwasyon: squatter’s area ug nagpunsidok ang kabalayan. Maglisod ang kabomberohan sa sentro sa sunog tungod sa kakuwang o kagip-ot nga dan. Way plano sa pagpuyo busa, daghang biktima. Kining dapita naila na unta nga risgo. Karong nasunog na, posibleng dunay reblocking sa dapit. Dili mas maayong mapatuman ang reblocking samtang wala pay sunog? Hinaut nga maleksiyon na ang mga opisyal ug mga lumolupyo. Pangandam.