2 MI-AMBUSH NI RELUYA GINGANLAN

ABACAJAN, LABITAD MAO PAY NAILHAN; UTOK, CONTACT WA PA

Mga suspek sa pag-ambush kang San Fernando Mayor Lakambini Reluya ginganlan na sa Special Investigation Task Group (SITG) base sa pamahayag sa mayor ug sa usa sa mga bodyguard nga naangol.

Sa briefing, si Sr. Supt. Manuel Abrugena, hepe sa Cebu Provincial Police Office, nipakita giunsa nila pag-ila sa duha sa mga suspek nga ni-ambush sa puti nga Toyota Grandia nga gisakyan nilang Mayor Reluya kauban sa iyang bana nga si Ricardo ug kaubanan.

Sigun sa mga saksi, ingon man nila ni Mayor Reluya ug ang bodyguard nga si Giovanni Perez, sa ilang pag-abot sa Barangay Linao, Siyudad sa Talisay alas 5 sa hapon niadtong Enero 22 gibabagan sila sa puti nga Toyota Innova.

Unang nagpabuto mao ang mga lalake nga sakay sa laing puti nga van. Nisunod na usab ang naa sa Innova.

Nakita ni Perez ang pagkanaog sa tulo ka mga lalake gikan sa Innova nga iya pa nga mahinumduman ang mga nawong.

Sa imbestigasyon, nailhan sila nga Jerome Labitad ug Felix Abacajan Jr. Nailhan sila ni Perez sa dihang gipakitaan siya sa hulagway gikan sa rogues gallery sa PNP Talisay.

Si Abacajan maoy nisuway pag-abli sa pultahan sa driver’s side nga mimando sa pag ingon nga “birahi pa” nga nagpasabot nga sigihan sa pagpamusil ang naa sa sulod sa van.

Nadunggan usab ni Perez ang estorya ni Labitad nga nagkanayon nga “gahi, dili maabli” sa dihang nikanaog sa Innova aron buksan ang van ni Reluya.

Silang Labitad ug Abacajan niduol sa van, nagpadayon sa pagpamusil kanila hangtod nga naigo na ang driver nga si Alan Bayot ug ang staff nga si Ricky Monterona

ILHON PA

Matod ni Abrugena nga padayon pa nila nga giila ang laing duha ka mga gunman, lakip na ang mastermind ug contact sa mga gun man base sa diagram nga gipakita sa SITG sa media.

“According to Mr. Perez, he saw clearly sa pagbaba sa tatlong gunman from the Innova, who continuously shot them. And these were the words he heard when one of the gunmen alighted from Innova, yung nag fire pa sa kanila was identified through the presentation of the rogues gallery presented by our personnel,” matod ni Abrugena.

Nibawos pa si Perez sa pagpamusil sa mga gunman hinungdan nga ang puti nga van nisibat.

Hinayhinay nga mibangga ang ilang gisakyan nga Grandia.

Pipila ka sigundo nganahunong ang buto-buto, adunay naabot nga sakyanan apan wa na makakita si Perez kay nanghapa na sila sa sulod.

Tingog na lang sa usa ka lalake ang ilang nadungog nga nagkanayon nga “gahi dili maabli” samtang laing lalake ang mitubag nga “birahi pa.”

DI PA MALAMBIGIT

Giklaro ni Abrugena nga di pa nila malambigit silang Ruben Feliciano ug Niel Enriquez nilang Labitad ug Abacajan kay wa silay ebidensya human sila ang ginganlan ni Mayor Reluya nga nagpaluyo sa pagpang-ambush. Sila si Feliciano ug Enriquez nanghimakak nga naa silay kalabutan sa ambush.

Ilang giinsister nga drugas ang motibo sa ambush, di pulitika.

Ang duha ningduaw sa buhatan sa CPPO niadtong Lunes, Pebrero 4, aron pagpailawom sa imbestigasyon.

Gihulagway karon ni Police Regional Director Chief Supt. Debold Sinas nga sulbad na ang maong kaso human mailhan ang duha sa upat ka mga gun man.

Apan iyang gipasabot nga di pa matawag nga sirado na ang kaso kay wa pa nila madakpi ang duha ka mga prime suspect.

Mando ni Sinas sa SITG mao ang pagpangita sa duha ug ilhon kinsa ang nagmando sa pag banhig kang Mayor Reluya.

Gipaabot nila ang resulta sa ballistics examination ug cross matching sa mga basiyo sa bala nga nakuha sa dapit diin nahitabo ang ambush ug ang armas nga nakuha sa balay ni Labitad.

“Katong gi raid siya sa iyang balay, nagpinusilay tapos nakadagan siya. Gipangbilin tong mga armas mao to among gi link karon. Wala pa may result sa scientific investigation. So, gihulat-hulat lang sa namo to before we will file a case,” matod ni Sinas. Silang Labitad ug Abacajan adunay daghan nga pending warrants of arrest ug mahimo rang dakpon bisan unsang orasa.