GIKINAHANGLAN SA NASUNOGAN

Pagkaon, tubig, habol, hygiene kit, sinina, suga, banig, moskitero, ug uban pa.

Mao lang kini ang mga importanteng gikinahanglan sa mga biktima sa sunog sa Sitio Bato, Barangay Ermita, dakbayan sa Sugbo niadtong Martes, Pebrero 5, nga nakaapekto sa 629 ka mga pamilya o 2,578 ka mga indibiduwal.

Subay ni Melit Abadiano, 50, usa sa mga biktima sa maong insidente nga kasamtangan karung nahimutang sa Ermita Sports Complex nga kasagaran nila nanginahanglan og banig o habol nga magamit nila isip higdaanan, tungod halos tanan nila wa gyu’y naluwas nga gamit.

“Personal hygiene kit. In-ani namo ron wala g’yod mi nabitbit kay wala baya mi didto. Ako rang anak usa. Kuan lang ba kahigdaan, lamesa, sige ra mi’g lingkod imbis gusto ta mopahuway dili ta kapahuway kay wala man tay kahigdaan,” saysay ni Abadiano sa Superbalita Cebu.

Nibutyag siya nga ka upat na kahigayon siya nakasinati og sunog sa maong lugar ug siya nagknayon nga grabe ang iyang gibati nga kaguol tungod kay bag-o pa nahuman ang ilang balay gikan sa unang sa pagka sunog niini sa samang dapit.

“Kaupat nani 1996, 2007, 2013, ug karon. Wala pa gyud ko niadto sa area kay maluya

ko, bag-o paman gud to nahuman ang among balay, ang ubos gipatarong intawn to sa akung anak ,wala pa abti og usa ka buwan nasunog dayon,” subay niya.

Mokabat sa 273 ka mga balay ang na ugdaw sa maong sunog nga ni lungtad og dul-an tulo ka oras, hinungdan nga mikatap kini sa tulo ka mga sitio sa maong barangay, Sitio Bato, Pig Vendor ug Kastilaan. HINABANG MIBAHA

Si Fancisco Escobal, 23, usa sab sa mga biktima, nitataw nga aduna na silay nadawat nga hinabang nga mga pagkaon gikan sa gobyerno ug sa non-government organizations.

“Ang ilang gihatag dinner and breakfast and naa say uban organizations manghatag sad. Kuan ang meal namo kay good for three days ra na nya kay nig fourth day manghatag na guro kuno ang (Department of Social Welfare and Services) DSWS og mga gamit ug financial assistance,” asoy niya. Matod ni Escobal nga usa sa ilang mga labing importanteng panginahanglan mao ang suga tungod wala’y kuryente sa evacuation area diin sila kasamtangang karung nahimutang.

“Ang kinahanglanon jud namo, tubig, banig, moskitero, ug solar lamp. Walay suga diri-a, namalit ra mig kandila. Ang among nasalbar kay sa kadaghan namog na-experience nga sunog kay ang pinaka improtante kay ang lantay man, bed. Nya naanad nalang sad mi nga ang among sinina kay isud nalang og isa ka bag dili na mag drawer-drawer.” siya niingon.

Samtang, si Elagita Sumalinog, 60, nisaysay nga ilahang gisuguro sa pagluwas ang iyang pag-umangkon nga adunay sakit.

“Wa gyud mi nahipos kay kanang na atol man nga ang amo rang gidali ang akung pag umangkon nga masakiton nga cancer ba, ang among mga butang wala na lang, wa gyud mi nasalbar nga butang,” masulub-ong pag-asoy niya ning mantalaan.

Naproblema sab si Sumalinog sa iyang graduating nga anak tungod naapil og ka ugdaw ang mga gamit sa eskwelahan ug thesis niini nga labing kinahanglan sa iyang pag-graduate.

“Ang ako ganeng anak nga mo graduate na unta sa UV, iyahang tanang mga gamit wa, ang katong iyahang thesis naapil tanan unya mao bitaw nagpatabang mi sa kapitan para mo adto didto sa Dean sa UV. Maka-graduate ba kaha intawn ni akong anak nga unsa kahay kuan sa iyang mga maestro, mosabot ba kaha,” asoy niya. STATE OF CALAMITY

Ang acting Barangay Captain sa Mambaling nga si Efe Rupinta miingon gipaubos na nila sa State of Calamity ang Ermita sa ilang emergency meeting kagahapon, Pebrero 6, ug nihatag na sila og letter request sa Department for the Welfare of the Urban Poor (DWUP) para ilang masuta kon unsa ang ilang mga angay lihukon.

“... sa (Cebu) city council pud hopefully nga mag-declare og state of calamity aron ma kuan (makuha) silag reblocking ug sa financial assistance,” asoy sa acting nga barangay kapitan.

Mapasalamaton sab si Rupinta ngadto sa mga concerned citizens ug sa mga laing organisasyon nga miapaabot sa ilang mga hinabang ngadto sa mga biktima. “Regarding sa mga hinabang, thankfully kay naay concerned citizens ug other organizations nga nanghatag og mga tubig, pagkaon, hygiene kit ug mga sinina.” dugang acting barangay kapitan.

Dugang niya nga kon mahuman na nila og han-ay ang mga hinabang ngadto sa mga 629 ka mga pamilya, ilaha ka kini ipang apod-apod.

“Hopefully nga mahuman na siya’g repack tanan karon (kagahapon). Kung makakuha nami og good for 629 families, amo na siya og ihinay hinay og hatag jud. Pwede ra sila (those interested to donate) mo-contact nako sa akong number 0936 941 5120 or modiritso sila sa Barangay Hall sa Ermita,” pulong sa kapitan

ning mantalaan. SINUGDANAN SA KAYO?

Si SFO3 Emiliano Daño, Cebu City Bureau of Fire Protection investigator, mibutyag nga base sa ilahang inisyal nga imbestigasyon, ang maong sunog nagsugod sa ikaduhang andana sa balay nga gipanag-iya ni Ronron Sarmiento.

Apan gihimahak na kini ni Jacky Espinosa kinsa live-in partner ni Ronron Sarmiento sa usa ka interbyu niadtong Martes nga sa ilahang balay nagsugod ang sunog tungod sa iyahang anak nga nagduwa og posporo. Misaysay siya nga sa pag-abot niya sa ilahang panimalay mas dako pa ang kayo sa ilahang silingan nga si Myrna Cerelles.

Samtang si Myrna Cerelles wa moangkon sa maong testimonya ni Espinosa.

“Ako may last nigawas. Pagtan-aw nako ang bata (4 anyos nga anak ni Ronron Sarmiento) naghilak na. Pagbira nako sa bata, nidagan ko padung sa ilang Ronron nga tindahan nya akong giingnan ‘Ron sunog sa inyo Ron.’ Diri gyud nagsugod. Sa akong side ba, ang tinuod sa ilaha man g’yod. Ka-komprontahon ko sa tawo nga nag-ingon nga sa amo nagsugod ba. Pero ayaw na lang, at least na-save nako iyang anak,” dason niya.

Ag mga biktima sa sunog gipahiluna sa Ermita Sports Complex ug Unit 2 Carbon Public Market. /