Pamilya ni Castro midangop sa PRO 7

Inahan ug igsuon ni anhing assistant prosecutor Mary Ann Castro nagpatabang sa hepe sa Police Regional Office 7 (PRO) 7 aron matutokan pagbalik ang kaso sa pag-ambush.

Subayon sa kapulisan ang mga kuha sa close circuit television (CCTV) camera sa dapit diin nahitabo ang krimen.

Matod ni Police Regional Office (PRO) 7 Director Chief Supt. Debold Sinas nga mihangyo ang pamilya ni Castro nga sulbaron ang pagpatay sa iyang anak.

Lakip sa ipatan-aw ang away sa iyang anak tali sa pipila ka mga pulis nga sakop kaniadto sa Regional Special Operations Group 7 (RSOG) 7.

Ang mao nga mga pulis gikiha ni Castro niadtong 2016 ug nasuspenso og tulo ka mga buwan.

Wa usab nila wad-a ang posibilidad nga adunay mga kaso sa illegal nga drugas nga gihuptan ang piskal dinhi sa syudad sa Sugbo, diin duna siyay naligsang mga tawo.

Lakip sa ilang i-backtrack mao ang mga kaso usab nga gihuptan niini sa Masbate.

Ipasubay usab ni Sinas ang kinabuhi ni Castro kon wa ba kini mga problema nga giatubang gawas sa iyang pagka piskal.

Duna usay gipakita nga video sa social media nga naka sunod sa gisakyan nga Nissan Juke nga nag subay sa dalan sa Escario Extention.

Nakita ang paggawas ni Castro gikan sa Cebu Business Park.

“Accordingly, naay mga sakyanan nga naay plate number. Naay babaye. So, we will check on that and verify sa ilang allegations. And I directed our cyber crime to open or to search sa mga Facebook para pud for our own verification,” matod ni Sinas.

Kon mailhan ug masayran ang admin sa Facebook page diin gi post ang video, mahimong ipatawag kini alang sa ilang imbestigasyon.

Tungod niini, gimandoan ni Sinas ang iyang deputy for operations nga dalhon ang inahan ug igsuon ni Castro kang Sr. Supt. Royina Garma aron mapakita ang maong video.

Si Sr. Insp. Arieza Otida, information officer sa Cebu City Police Office, nitug-an nga ang SITG Castro nag backtracking karon sa gipanghuptan nga mga kaso sa biktima dinhi sa syudad sa Sugbo. /